Shillong, Naiwieng 10
Ka Ryntih FC ka la pynkut noh shi syndon ïa ka kontrak jong uwei na ki ‘rang ïalehkai hadien ba kane ka klob ka la suba ba u la ailad ban thep kol ïa ka Shillong Lajong FC ha ka lympung ïalehkai Shillong Premier League 2024.
Katei ka jingïakhun ka dei ba la long ha ka Sngi Saitjaiñ ha SSA Stadium kaba ha Polo, ha kaba ka Ryntih ka la shah rem haduh 3-0 kol ha ka Lajong. Kane ka dei ka jingshah rem kaba lai ïa katei ka klob na Mawlai na ki saw sien ïakhun bad ïakhaid shisien.
Kat kum ka pyllait katei ka klob ha ka rynsan social media ka la pynpaw ba ka la pynkut noh ïa ka kontrak jong uwei ‘rang ïalehkai (ba dang buhrieh shwa ïa ka kyrteng) halor ka jingsuba ba u la ailad ban thep ïa ka Shillong Lajong.
“Kum ka klob ngi la hap ban pynkut noh ïa ka kontrak jong uwei u ‘rang ïalehkai namar ha ka jingbishar thuh lyngba ka video, ngi la suba jur ba u la ailad haduh ar kol ïa ka Lajong. Wat la ngim pat lah ban pynthikna, hynrei ngi don ka jingsuba kaba jur ïa u. Ngim kwah ba ki ‘rang ïalehkai kin shu shah thied hano-hano, hynrei lada jop ne rem ngi dei ban ïalehkai da kaba hok,” la pynpaw u coach ka Ryntih u Wallam Kharpran haba ïakren bad u nongthoh khubor ha ka Sngi U Blei.
Kumba ka long mynta ka Ryntih ka la dep ban pyllait lut ïa baroh ki ‘rang ïalehkai kiba nabar jylla bad mynta ki don sa tang ki ‘rang ïalehkai kiba dei ki Khasi.
Lah ban kdew dangshen na ka liang ka Mizoram Football Association ka la khang haduh 25 ngut ki ‘rang ïalehkai na ki kam ïalehkai phutbol ha katei ka jylla hadien ba la lap ba ki la don kti ha ka ban pynbeit lypa ïa ki jingïa-lehkai ha ka aïom ba la dep.
Napdeng kitei 25 ngut, 2 ngut ki dei kiba ïalehkai na ka Nangkiew Irat SC ha ka SPL mynta ka aïom ha kaba na ka liang ka Meghalaya Football Association (MFA) ka la weng shi syndon ban wan ïalehkai ha kane ka Jylla.
