Tura, Naiwieng 11
Hadien ka jingsangeh ba shi por namar ka tamasa ‘Wangala’ ba dang shu kut shen, ki samla pule ka NEHU Tura Campus sa shisien ki la ïashim bynta biang ha ka jingïakhih, kaba long ruh kum shi bynta ban ai jingkyrshan ïa ki paralok nongïakhih kiba ha Shillong.
Ha ka Sngi Balang, ki samla pule ka Tura Campus ki la ïasnohkti lang bad ka kynhun kaba kham heh jong ka NEHU kaba ïakhih ban dawa weng ïa u VC ba mynta, u Registrar lem bad kiwei-kiwei ki jingdawa jong ki samla pule.
Ki samla pule ka NEHU – Tura Campus ba la ïasnoh kti lang da ka GSU bad ka GSMC ki la kular ban bteng ïa ka jingïakhih tat haduh ba ki bor ba dei khmih kin pynurlong ïa ki jingdawa jong ki.
Ki khyrdop ban rung sha katei ka jaka pule ki la khang khyrdep ha ryngkat ki samla pule kiba la shong hakhmat ban pynpaw ïa ka jingïatylli bad kito kiba ïakhih ha Shillong kumjuh ban dawa pynbha ïa ka jaka pule jong ka Tura Campus.
“Ngi kyrshan ïa ki jingdawa jong ki paralok ha Shillong bad dawa weng ïa u VC bad Registrar uba la shah thung be-aiñ. Hap ban pyni ïa ka jingkhang sha kine kiba shah thung be-aiñ. Shuh shuh ngi dawa ruh ba dei ban buh PVC ha Tura Campus naba ngim shym la don la palat 2 snem mynta,” ong u samla pule PhD, u Amsrang Momin.
Ïa kane ka jaka pule mynta la pynïaid da u nongpeit ka jaka pule, kaba long tang ka jingpynbeit ba shipor, hynrei kaba la kylla long pat ka jingpynbeit kaba neh ha NEHU – Tura.
“Ngi dawa ruh ban pyndap ïa ki kam ba lait kiba la mih na ki daw bapher-bapher. Ki don bun bah ki jingeh ha ka jaka pule jong ngi kynthup ka jingbym don ïa ki bos, ki jingdonkam hapoh ka jaka pule, ka jingeh ha ka liang ka umbam-umdih bad kiwei-kiwei. Ka jingdawa jong ngi ka long ba ka PGSU, kaba dei ka kynhun ki samla pule jong ngi na bynta ban rah ïa ki mat, ka la shah pynduh noh la palat 2 snem mynta bad donkam ban pynkylla ïa kane,” bynrap u Amsrang.
U Chokram Sangma, samla pule 2nd Year MA ha ka tnad pule ‘English’ u la pynsngew ïa ka jinghiar jong ka NEHU naduh ba shimti u VC ïa ka kam.
“Tang hashuwa ban thung ïa u, ka NEHU ka la don ha ka kyrdan kaba 95 ha ka ri ha ka thup jong ki Skulbah. Naduh ba u la shimti, ngi la leh sniew haduh katta-katta bad mynta ngi don ha ka kyrdan kaba sha trai – 175. U VC u donkam ban hiar shuki namar ki kam jong u ki buh jingma ïa ka lawei jong ki samla pule ha ka Jylla.,” pynsngew u Chokram.
U Banteilang Kharbani, u samla pule 2nd Year ha ka tnad pule ‘English’ u la kham kynthoh shuh-shuh halor kaei kaba jia ha NEHU da kaba kynnoh ba u Registrar um da tbit wat ha ka ktien phareng bad kumta donkam ban beh kam mardor ïa u ryngkat bad u VC.
Shuh shuh u Co-Chairman ka GSMC, u Balkarin Ch. Marak u la ther tyngeh ïa katei ka jaka pule da kaba ong ba ka jinglong-jingman ha kane ka jaka pule mynta kam long kaba bit ba biang na bynta ka pule-puthi. U la kular ban ïeng ha syndah bad ka jingïakhih haduh kaba kut ban pyntikna ba ïa ki jingdawa jong ki samla pule la sngap da ki bor ba dei khmih ka Jylla bad ka Sorkar Pdeng.
