Khliehriat, Naiwieng 11
Ka Sutnga SSCC ka la ïoh jingjop ha kaba sdang ïa ka lympung ïalehkai Super Division Football Tournament (4th Kyrmen Shylla Contribution Trophy) ba la pynïaid da ka East Jaiñtia Hills District Football Association (EJHDFA) kaba la long ha ka Lah Sngi U Blei ha madan EJDSA Artificial Turf kaba ha Diengshynrum, Khliehriat.
Kane ka nam jop jong ka Sutnga SSCC ka la wan urlong hadien ba ka la lah ban pynliem noh ïa ka Chiehruphi SYWSC da 1-0 kol. Ïa kane kol la thep da u Raplangki Lyngdoh ha ka minit kaba 48 na ka bynta ban ïoh ïa ki lai point.
Haba phai sha ka jingïalehkai kaba bud hapdeng ka Rymbai Ïawpynsing SC bad ka Thangskai Tiger SC ki la ïasam mar shi point hadien ba ki la thep mar 1-1 kol.
Ïa kane ka lympung ïalehkai la wan ban plie da u Bah Grimlang Dkhar, uwei na ki ‘riew rangbah ka thaiñ Elaka Narpuh kum u kongsan ha ka jingdonlang u symbud kongsan Bah Streamly Nongjop Suchen, President ka seng KSU East Jaiñtia Unit, ki nongïalam bad dkhot nongkitkam jong ka EJHDFA ba kynthup Bah James Sutnga, General Secretary ka EJHDFA nalor kiwei pat.
