Shillong, Naiwieng 11
Ka NEHU-Students’ Union (NEHUSU) bad ka Khasi Students’ Union (KSU) NEHU-Unit, ki la ujor sha ka President ka Ri, ka Droupadi Murmu pyrshah ïa u Vice-Chancellor (VC), u Prof. Prabha Shakar Shukla halor ka jingbym don jong u ha NEHU wat hapdeng ka jingïakhih shah thngan kaba la ïaid mynta la bun-bun sngi ha kane ka skulbah.
“Ka NEHUSU bad KSU – NEHU Unit, ki aiti ïa kane ka jingujor haba ïadei bad ka jingsngewkhia halor ka jingbym don u VC ha ka kam jong u wat hapdeng ka jingïakhih shah thngan ba khlem buh por kaba dang ïaid ha ka skulbah,” ong ki nongïalam jong ar seng ha ka shithi ba la phah sha ka President ka Ri ha ka Lah Sngi U Blei kaba dei ruh ka Nongwan Jngoh jong ka skulbah.
Ki la ong ruh ba watl a ka jingïakhih shah thngan ka la dap 7 sngi (146 kynta) naduh ba sdang, hynrei u VC um shym la lah satia ban pyndep ïa ki kamram.
“Ka jingbym don u VC, khlem kano-kano ka jingpynbna ne jingpyntip lypa, ka long ka jingsngewkhia kaba khraw bad ka ktah shi kat dei ïa ka jinglong nongïalam jong u bad ka jinglah jong u ban shimkhia ïa ka jingeh kaba dang ïai bteng. Ha ka jaka ban ïashim bynta shitrhem ban pynbeit ïa ki jingeh ba ïadei bad ka jingïakhih shah thngan – ka jingbym lah jubab jong u VC ne wat ban don ha ka jaka pule ka pyni ïa ka jingbym lah jong u ban pynïaid beit ïa ka jinglong-jingman,” ki la ong.
Haba kdew ba ka jingïakhih shah thngan ka la ktah jur ïa ka koit ka khiah ki samla pule (ba ïakhih), ki nongïalam ki la ong ba katto-katne ngut na ki samla pule, ki la shah sumar ha ‘hospital’ namar ka jinglong-jingman ka koit ka khiah, kynthup ïa ka ‘seizure’ bad ka jinghiar kaba shyrkhei jong ka ‘Blood Pressure’ bad ‘Blood Sugar’.
“Ka jingbym don u VC, ha ryngkat ka jingbym ïoh jingtip lano un wanphai, ka buh jingma shi kat dei ïa ka jingim ki samla pule kiba ïakhih. Ka jingbym lah jong u ban pynbeit ïa ki jingeh jong ki ne wat ban ai ïa ka jubab ha ka por kaba biang ka buh jingkylli shaphang ka jingtbit bad jingkitkhlieh jong u kum u VC,” ong ki nongïalam.
Ha kajuh ka por, haba pynsngew ba ki eksamin ‘Undergraduate’ ki la jan, ki la ong ba ka jingbym don u VC ka la pynthylli ïa ka jingdon nongïalam haba phai sha ka jingpynïaid kam naba ym shym la shim ïa ki lad ki lynti ba shipor ban pyntikna ïa ka jingïaid beit jingïaid ryntih jong ki eksamin – kaba ktah ym tang ïa ki samla pule jong ka skulbah hynrei kito kiba pule ha ki kolej ba pynïasoh bad ka NEHU.
“Kane ka jingbym lah ban pynbiang ïa ka kam nongïalam ha ka por kaba eh ka buh jingma ïa ka lawei ka pule-puthi jong kiba bun ki samla pule,” ong ki nongïalam jong ar seng.
“Kane kam dei ka sien ka banyngkong. U VC u don ïa ka histori haba ïadei bad ka jingbym don ne jingbym jubab ha ki por jingeh, kaba pynthut shuh-shuh ïa ka jingshaniah kaba ki samla pule ki don ïa ka jinglong nongïalam jong u. Ka jingbym lah jong u ban pyndep ïa ka kamram ha ki por ba kyrkieh ka la ïalam sha ka jingbitar kaba jur hapdeng ki samla pule. Haba ïadei bad kine ki mat kiba khia ba shon, ki samla pule kim sngew shuh ba u VC u long uba bit ban ïalam ïa ka skulbah,” ki la ong.
Ki nongïalam ka NEHUSU bad KSU-NEHU Unit ki la ong ruh ba ka jingbym lah jong u VC, ka jingbym shimkhia jong u, bad ka jingbym kheiñ snep jong u ïa ka bha ka miat jong ki samla pule ka la ktah jur ïa ka jingshaniah jong ka jaka pule.
Shuh shuh ki la bynrap, “Ki seng namarkata, ki kyrpad ba dei ban weng noh mardor ïa u VC na ka kam jong u, naba u la pyni ïa ka jingbym lah ban pyndep ïa ki kam kiba dawa jong ka ophis.”
“Ngi kyntu da ka jingburom ïa ka ophis jong phi ban shim ki sienjam kiba kloi bad ba biang ban weng ïa kine ki jingeh kumjuh ban pyntikna ba ka skulbah kan treikam ha ka rukom kaba beit ba ryntih na bynta ka jingbha ki samla pule jong ka,” ong ki nongïalam na ki ar seng.
