Shillong, Naiwieng 11
Ha ka Lah Sngi U Blei ka 11 tarik mynta u bnai, ha ryngkat ki ummat kthang la pyndep ïa ka jingleit ontep donburom ïa ka met kaba sah jong u Sepoy Aibok Madur ha ka shnong Lyngkhoi, kaba dei ruh ka shnong jong i kurim jong u.
Lah ban pynkynmaw ba u Bah Aibok Madur uba trei kum u Sepoy ha ka GOC, Fire and Fury Corps jong ka Indian Army. U la duh noh ïa la ka jingim ha ka jingïakhun pyrshah ïa ki nongshun ha ki bynta jong ka Siachen Glacier jong ki lum thah Makashang ha ka jylla Jammu & Kashmir ha ka 7 tarik u Naiwieng, 2024.
Ha shwa ban rah ïa ka met jong une u ‘riewshlur ka ri sha u lum jingtep, la pynlong da ka Jingïaseng leh burom khatduh kaba la pynlong ha ïingsah jong u ha ryngkat ka jingïadon lang ki para shipai kiba la shim ruh ïa ka bynta ban leh burom katkum ka rukom jong ki bad hadien kata la rah ïa ka met jong u Bah Aibok kaba la thep ha ka synduk ïa kaba la tap najrong da ka lama lai rong ka Ri India da ki shipai sha u lum jingtep jong ka Balang Katholik kaba don ha ka shnong Lyngkhoi hi.
U Bah Aibok Madur uba long u shipai hapoh ka Assam Regiment uba la don 34 snem karta u la iehnoh shadien ïa uwei u khun shynrang bad ka kurim. Ïa ka jinglehniam ba khatduh la pyndep da u Parish Priest ha ryngkat ka jingïadonlang u Fr. Felix Lyngkhoi, ki ‘riew rangbah jong ka Balang bad kiwei-kiwei. Ha kane ka sngi la wan ban sngewlem da ki paralok-parajor, bahaïing-bahasem bad ka la don ruh ka jingwan buh syntiew bad ai mynsiem ïa ka ïing ka sem jong u Bah Aibok da ka shlem treikam jong u Myntri Rangbah ka Jylla. Kum ban shu pynkynmaw ha kaba ïadei bad ka jingkhlad noh jong u Bah Aibok na ka liang u Myntri Rangbah ka Jylla, u Conrad K Sangma u la pynbna ban ai jingïarap da ka song pisa kaba haduh T.20 lak bad kular ba kum ka Sorkar kan don ryngkat bad ka ïing ka sem jong une u ‘riewshlur ka Ri.
