Shillong, Naiwieng 11
Ka Malki SC ka la ïoh jingjop ha ka lympung ïalehkai 1st Division Football League 2024 ba la pynïaid da ka Shillong Sports Association, hadien ba ka la lah ban pynliem noh ïa ka Mylliem SC da 2-1 kol ha ka Lah Sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba u Lamphrang Kharbuli bad u Fashioning Syngkli, katba u Kevin Kurkalang u la lah ban pynphai kol na ka bynta ka Mylliem.
Ha kane ka jingïakhun baroh ar ki kynhun ki la pyrshang ban ïalehkai bha naduh kaba sdang, hynrei tang hadien shiteng kynta ka Malki ka la ïoh ban pynkhih jar lyngba u Lamphrang ha ka minit kaba 37 na ka bynta ban tam shi kol ha ka kylla step.
Hadien katto-katne por ba la bteng ïa ka jingïakhun jong ka kylla miet ba ka Mylliem ka la lah ban pynïakhaid kylla lyngba u Kevin ha ka minit kaba 59. Ha shwa ban wai ka Malki ka la lah ban thep biang sa shi kol lyngba u Fashioning ha ka minit kaba 84 na ka bynta ban ïoh jingjop syndon.
Haba phai sha kawei pat ka jingïakhun hapdeng ka Sohryngkham SC bad ka Lawsohtun SC, ki la ïasam mar shi point hadien ba ïakhaid mar 2-2 kol.
Ha kane ka jingïakhun ka Sohryngkham ka la ïoh ban thep ar kol ha ka kylla step lyngba u Wallambha Kharpran ha ka minit kaba 13 & 17. Na ka liang ka Lawsohtun ka la lah ban pynïakhaid kylla ha ka kylla miet lyngba u Blasha Nongkynrih (76) bad u Rangdajied Rynjah (78).
Ka jingïalehkai ha ka Sngi Ba-ar kan long hapdeng ka Umphyrnai SC pyrshah ïa ka Mawkhar SC ha ka por 12:15 mynsngi, katba ka Nongkseh SC ïa ka Pohkseh SC ha ka por 3:15 nohphai sngi.
