Shillong, Naiwieng 11
U Bah FG Kharshiing, uba la shah thung kum u Mission Director jong ka projek DREAM ba la thaw da ka Sorkar Jylla, ha ka Lah Sngi U Blei u la leit ban ïakynduh ïa u Myntri ka tnat Social Welfare, Bah Paul Lyngdoh na ka bynta ban ïakren ïathir halor ki jingsniew kiba mih na u drok bad kumno ban ïaid shakhmat ban ïakhun ban tehlakam bad rat dyngkhong ïa une jingsniew.
Haba kren sha ki lad pathai khubor hadien ba la dep ban ïakynduh ïa u Myntri, u Bah Kharshiing uba dei ruh u pulit IPS ba la shongthait, u la pynpaw ïa ka jingsngewkhia halor ka jinglong-jingman bad ki jingsniew kiba har rukom kaba mih na u drok.
“Ha kane ka jingïakynduh ïa u Myntri, nga la ïoh ban shim jingmut bad kumjuh ban ai jingmut kumno ban ïaleh ban tehlakam ïa ka jingkynrei jong u drok,” ong u Bah Kharshiing bad bynrap ba ka mat ba hakhmat eh ka jong u, wat la kane ka kam ka long kaba khia, ka long ban ïarap ïa ka jaidbynriew ha ka ban pynduh ïa u drok.
“Wat la ngam pat don ïa kiwei ki dkhot ne don ka kamra ban sdang ïa ka jingtreikam, hynrei da ka jingsngewkhia halor kane ka kam, nga la khot jingïalang ha ka 13 tarik tarik bad ki shnong ki thaw, ki skul, kolej, ki seng bad baroh kito kiba don jingsngewkhia ban ïakren bad ïatai sani halor kane ka bynta kumno ban ïaid shakhmat,” la ong u Bah Kharshiing.
Shuh shuh u Mission Director bathymmai u la ong, “Ka jingthmu ba hakhmat eh jong ka Sorkar lyngba kane ka projek DREAM ka long ban rat dyngkhong ïa u drok. Ngi donkam ban pynduhjait ïa une u jingdih ba sniew, bad ïa kane ngin lah tang lyngba ka jingïatreilang jong baroh naduh ki shnong ki thaw, ki seng, ki skul, nalor kiwei kiwei.”
U Bah Kharshiing u la ong, ba u la ïohi ba bun palat khynnah ha lynti-syngkieñ kiba pyndonkam ïa u drok, bad ong ba ka jingngam jong ki khynnah ha u drok, ka ktah ym tang ïa ka ïing ka sem ne ka imlang-sahlang hynrei ka ktah ruh ïa ka ïoh ka kot jong ka ri. Lada ki khynnah kiba dang rit ki la ngop ha une u jait jingdih, te shano ka lawei?
Ha kajuh ka por u la ong donkam ban tur thma ïa kane ka jingsniew kaba la ktah haduh katta-katta bad u kyrmen skhem ban pyrshang katba lah ban trei shitom ban ïakhun pyrshah ïa une u jingsniew bad ruh u la kular ban trei katba lah bad ki shnong ki thaw, skul, kolej bad lyngba ka jingkyrshan ka tnat pulit ban lah pynduhjait ïa u drok.
