Shillong, Naiwieng 12
Ka Executive Council (EC) jong ka North Eastern Hill University (NEHU) kaba la long ha ka Lah Sngi U Blei ka la rai ban thaw da ka komiti tohkit (Inquiry Committee) ban khmih bniah halor ka jingthung ïa u Registrar bad Deputy Registrar hapoh ka skulbah.
Haba ïakren bad u Vice-Chancellor (VC) ka NEHU, Prof. Prabha Shankar Shukla lyngba ka ‘phone’ ha ka Sngi Ba-ar, u la ong ba 11 na 12 ngut ki dkhot kiba la ïashim bynta ha ka jingïalang ki la poi sha ka rai ban thaw da ka komiti tohkit.
U VC u la ong ruh naba ka dei ka sngi shuti, ka jingpynbna haba ïadei bad kane yn sa pynmih ha ka sngi long trei ka ban wan.
Ha kawei ka liang, u la pynpaw ka jinglyngngoh ba balei ki samla pule kim treh ban wan shakhmat ban ïakren.
Haba kylli, u VC u la ong ba um shym la jah hynrei u don hajan ka Campus.
“Nga don shane hi hajan ka Campus, ngam shym la jah,” u la ong.
Halor ka khubor ba ïadei bad ka jingleit shuti u VC, la ïoh jingtip ba ka don ka khubor kaba kum kata hynrei ym pat lah ban pyntikna la ka dei kaba shisha ne em.
Haba la pyrshang kynjoh ïa u VC halor kane, ym shym la ïoh.
Ha kawei ka liang, Myntri Rangbah ka Jylla, u Conrad K. Sangma ha ka rynsan lad pathai, u la thoh ba u la ïoh pdiang ïa ka ‘call’ na u Myntri ka tnad pule-puthi ka Sorkar Pdeng, u Dharmendra Pradhan halor ka jingkular jong u ban wad ka lynti ban pynbeit ïa ki kynrum-kynram ba mynta ha NEHU.
Na ka liang u Sangma u la ai khublei ruh ïa u Lat ka Jylla, u C.H. Vijayashankar halor ka jingtuklar jong u haba ïadei bad kane ka bynta.
Ka jingïakhih shah thngan ba khlem buh por ki samla pule ka skulbah hapoh ka lama jong ka North Eastern Hill University Students’ Union (NEHUSU) bad ka Khasi Students’ Union (KSU – NEHU Unit) kaba la sdang naduh ka 5 tarik u Naiwieng ka la kynjoh sha ka 8 sngi ha ka Sngi Ba-ar.
Ki samla pule ki la dawa ïa ka jinghiar shuki jong u VC bad ban weng ïa u Registrar bad Deputy Registrar nalor kiwei kiba la shah kynnoh thung kam be-aiñ ha ka skulbah.
