Shillong, Naiwieng 12
Ka jingïalang ki Myntri ka tnat Bording jong baroh ki Jylla ka la long hynne ka Sngi Ba-ar ha nongbah Delhi, ïa kaba la pynïaid da u Union Power Minister, u Manohar Lal. Ha kane ka jingïalang u Myntri Bording ka Jylla, u Abu Taher Mondal u la pynsngew ïa ki jingtreikam ka tnat Bording bad kdew ruh ïa ki jingdonkam jong ka Jylla hakhmat u Myntri ka Sorkar Pdeng.
U Mondal u la pynsngew shuh shuh ha kane ka jingïalang halor ka jingïaid ka RDSS, bad ki jingïadei halor ka jingpyntreikam ïa ki Smart Meter Scheme hapoh ka RDSS. U la pynpaw ruh ba ka jinglut ha kaba sdang pyntreikam ïa ki Smart Meter ka kham heh ban ïa kaba la mang pisa, wat la ka jingpynlut ka jan long mar kumjuh bad kiwei ki Jylla kane ka thaiñ Shatei Lam Mihngi, bad namar ka jingmang pisa ka la heh lypa, na ka liang u Mondal u la kyntu ïa u Myntri ban pynkiew noh ïa ka subsidy jong u Smart Meter.
Ha kaba ïadei bad ki Pumped Storage Projects ha Meghalaya, u Mondal u la pynpaw ba ka Jylla ka la ïoh ïa ka jingtyrwa ban tei ïa ki pumped storage projects kaba lah ban kit kumba 4800 MW. Namar ka dor jong kine ki projek ka lah ban kiew, u la kyntu ïa u Myntri ka Sorkar Pdeng ban thaw lad kumno ba ka Jylla kan ïohnong da kaba shu ai ei ka bording.
Shuh shuh u Mondal u la pynpaw ba ki don shibun ki small hydro projects ïa kiba la dep pynkhreh ka DPR bad ïathuh ruh ba ka jingpyntrei ïa kine ki projek lah ban sdang noh kham kloi. Ha kajuh ka por u la pynpaw ba ka Jylla ka duna ka jingïoh pisa bad kyntu ïa u Myntri ba ka MNRE kan sdang biang ka jingïarap pisa ba la sangeh noh kaba long T.7.5 klur na ka bynta ban shna ïa ki small hydro project.
Ha kane ka jingïalang u Secretary ka MNRE u la pyntip ba na ka bynta ban ïakren beit ïa ki kam Bording kiba ïadei bad kane ka thaiñ, yn pynlong ïa ka jingïalang hangne ha nongbah Shillong ha ka 27&28 tarik mynta u Naiwieng.
Ha kane ka jingïalang la wan ban shim bynta ruh da ki CMDs’ jong ka NTPC, NEEPCO, PGCIL bad SJVNL, Secretary ka Ministry of Power, Secretary MNRE, Chairman ka CEA bad ki CMD ka REC bad PFC.
