Shillong, Naiwieng 12
Ka lympung ïalehkai tied golf ba la tip kum ka MGPS Meghalaya State Golf Championship 2024 bad ka Batkupar J Synrem Memorial Open kan sdang naduh 15 haduh 17 tarik mynta u bnai ha Assam Rifles Environmental Club Park and Training Area kaba ha Laitkor.
Ïa kane ka lympung la mynjur lang da ka Indian Golf Union East Zone Junior & Amateur Feeder Tour ka ban pynïaid da ka Meghalaya Golf Promoters’ Society kaba la ïoh jingithuh na ka Meghalaya State Olympic Association bad ka IGU. Ka Batkupar J. Synrem Memorial Open ka dei kaba la ai kyrteng da u nongseng jong ka MGPS uba la khlad noh.
La khmih lynti ba palat 90 ngut ki nongïalehkai golf, kynthup ïa ki khynnah rit, ki rangbah bad ki kynthei, kin ïashim bynta ha kane ka jingïalehkai. Ki nongïashim bynta kin pyni ïa ka jingtbit ba bha tam jong ki ha ka jingïalehkai tied golf hapdeng ka jingitynnad bad jingphuh jong ki ‘tiew dienglieng jong ka nongbah ha ki ar tylli ki lympung ïalehkai.
Ka 15 tarik mynta u bnai kan dei ka sngi kilan met bad ki ar sngi kiba sah ki dei ki sngi ïalehkai. Ïa kane ka jingïakob la phiah kyllum ha ki ar bynta, kita ka Amateur (Amateur, Mid-Amateur, Senior, Super Senior & Ladies categories), bad ka Junior (Junior A, B, C, bad kiwei ki kyrdan ïalehkai).
