Jowai, Naiwieng 13
Ka Nangbah Mulang ka la ïoh jingjop bad don ha khlieh duh jong ka miej kheiñ poiñ da kaba ïoh 9 poiñ ha ka jingïalehkai Super Division-U Kiang Nangbah Memorial Trophy 2024 ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka Nangbah Mulang ka la pynliem ïa ka Demthring da 2-1kol ha ka jingïalehkai kaba la long ha ka Sngi Balang ha madan Kiang Nangbah Stadium, Jowai. Ïa ki kol jong ka Nangbah Mulang la thep da u Roland Shylla ha ka minit kaba 2 bad Samepaia Ryngki ha ka minit kaba 90+1. Katba na ka Demthring la thep da u Marshial Nongrum ha ka minit kaba 40.
Ha ka jingïalehkai kaba bud, ka Ladthadlaboh bad 7 Wasa United ki la ïakhaid khlem don ba thep kol. Ka Ladthadlaboh ha ka miej ïakheiñ poiñ ka la ïoh 7 poiñ, ka 7 Wasa United 5 poiñ bad ka Demthring 4 poiñ.
Ha ka 15 tarik Naiwieng ka jingïalehkai kan long hapdeng ka Mukhla Raij bad Wahïajer ha ka por 11.00 baje mynstep, ka Demthring bad Sailung Ïalong ha ka por 2.00 baje nohphai sngi.
