Itanagar, Naiwieng:
Ki pulit jong ka Tawang ki la pynlong ïa ka jingïalang jong ka Narcotics Coordination Committee (NCORD) jong ka District Level ha ka jaka treikam jong u Deputy Commissioner, ba la ïalam da u In-charge Deputy Commissioner u Sang Khandu.
Ka jingïalang ka la pynleit jingmut halor ka bynta ban pynkhlaiñ ïa ka jingïatreilang bad ka kynhun khnang ban lah tehlakam ïa ki kam ba mih na u drok ha Tawang.
Ki ophisar ba kongsan kiba la wan ban ïashim bynta ha ka jingïalang ki kynthup ïa u Deputy Superintendent of Police (Dy SP) Tasso Kato, Divisional Forest Officer Piyush Gaikwad, DDSE Tawang Hridar Phuntsok, ha ryngkat ki nongmihkhmat na ki kynhun wadbniah, ki shipai bad na ka Bazaar Committee jong ka thaiñ.
U Dy SP Kato u la pyni ïa ki buit treikam kiba dang ïaid shakhmat ban ïakhun pyrshah ïa ka jingkhaïi drok, da kaba kyntu ïa ki Secretary jong ka Bazaar bad ki Gaon Burah ban sam lem ïa ki jingtip kiba lah ban ïarap ban ithuh ïa ki nongkhaïi drok ha ka thaiñ.
Ki Secretary jong ki Bazaar ki la tyrwa ban pynlong ïa ki jingleit khynra bym poi pyrkhat ha ki jaka ïew kum ka lad jingïada.
Ka kynhun wad bniah bad ki nongmihkhmat jong ki shipai ruh ki la ïasam ïa ki jingai jingmut na ka bynta ban pynbha shuh shuh ïa ka jingïatreilang.
Kum ka jingpynkut ïa ka jingïalang, u Sang Khandu u la ban jur ïa ka jingdonkam ban pynlong ïa ki jingïalang jong ka NCORD man ka por ban long kiba husiar pyrshah ïa ki jingma kiba lah ban mih na ki jingdih pynbuaid, da kaba kdew ïa ka jingduna jong ki jingjia jong ka NDPS hynrei da kaba pynksan ïa ki sienjam kiba shimkhia ban ïada na ka jingnang kiew arshah.
U la ai mynsiem na ka bynta ka jingïatreilang kaba jan hapdeng ki kynhun wadbniah bad ki Bazaar Committee na ka bynta ban pynkloi ïa ka jingïarap lada donkam ha kano kano ka por.
