Nongpoh, Naiwieng 13
Ar ngut ki briew kiba donkti ban shon bad pynïaid ïew ïa ki pisa thok, ki la shah kem noh ha ki bor pulit Special Task Force (STF) jong ka jylla Assam ha ka Sngi Balang katba ki dang thmu ban pynïaid ïew ïa ki pisa thok kiba dei da ki lut T.500 ha ka thaiñ Khanapara.
Katkum ka tyllong khubor ba la ïoh lum na ki bor pulit, la ïathuh ba kitei ar ngut ïa kiba la tip kyrteng kum u Md Sahil Ali, 21 snem ka rta na Karaibill, Bhaoria Bhitha kaba hap ha ka thanat Chhaygaon jong ka district Kamrup, Assam bad u Harsh Wahlang, 20 snem ka rta na ka shnong Baridua, Ri Bhoi District, tang mar ïa ïohi ïa ka kynhun pulit, ki la phet krad sha ki bynta jong ka Koinadhara lyngba kawei ka kali Maruti Suzuki A-star kaba don ïa u registration number AS02-F-8100.
Na ka liang ka kynhun ki pulit ka Assam ruh ki la kthong ïa kitei ar ngut, bad ïoh ban kem noh ha ki bynta jong ka surok Koinadhara-APSC kaba dang hap hapoh ka jingkhmih jong ka thanat Dispur.
Hadien ka jingkem bad talasi ïa kitei ar ngut, ki pulit ki la ïoh ban kurup noh ïa ka pisa kumba T.3.70 lak (Lai lak hynñiewphew hajar) kaba dei ka pisa thok (Fake Indian Currency Notes) kaba dei da ki lut T.500/- bad kawei ka mobile lem bad katei ka kali kaba la pyndonkam ha kane ka kam beaiñ.
Na ka jingphla shuh shuh jong u Md Sahil Ali, ki bor pulit ki la pynlong ruh ka jingkhynra ïa ka ïingwai ka jong u ha 9 Mer Baridua, Ri Bhoi District, ha kaba ki la ïoh shuh shuh ban kurup sa kumba T.3,17,500/- (Lai lak khathynñiew hajar sanspah) ka pisa thok da ka lut T.500/, kawei ka kor shon pisa thok (FICN Printing Machine), shi song ki kot sada lieh kiba don ha ka jingheh kum ka pisa T.500/-, shi song ki kot sada lieh kiba la song ha ka cello tape rong jngum bad shi song ki kot sada lieh.
Na ka liang ki bor pulit ka jylla Assam ki la kem noh ïa kitei ar ngut kiba donkti halor kane ka kam beaiñ bad pynngat ïa ki katkum ki kyndon jong ka aiñ. Ka jingtohkit halor kane ka bynta ka dang ïaid shakhmat khamtam ban lapdien shuh shuh ïa kiwei kiba donkti.
