Shillong, Naiwieng 13
U David Coote, referee jong ka Premier League u la shah sospon ha ka Lah Sngi U Blei hadien ba la pynmih ïa ka dur-khih ha ki lad pathai social media kaba paw ba u kren beiñ ïa u nongpynïaid barim ka Liverpool, u Jurgen Klopp.
Ym pat lah ban tip mynno la shna ïa kane ka dur-khih lane kumno ka la mih paidbah bad ka Britain’s Press Association ka la ong ba kam shym la pynshisha ïa kata. Katkum ka dur-khih, u Coote u la ong ba u Klopp u long uba sngew sarong bad pyndonkam da ki ktien kiba pynjah burom. Ka BBC, ka ong ba katei ka dur-khih, ka paw ba ka thew ïa ka jingïalehkai, kaba u Coote, u la pynïaid hapdeng ka Liverpool bad ka Burnley, ha u bnai Naitung jong u snem 2020, kaba la kut da 1-1 kol. U Klopp u la kynthoh ïa u Coote hadien ka jingïakhun, da kaba ong ba u referee u la leh jemnud palat ïa ki jingleh ka Burnley.
Ka kynhun jong ka Referee ka Professional Game Match Officials Limited (PGMOL) ka la ong ha ka kyrwoh ha ka Lah Sngi U Blei: “Ïa u David Coote la sospon mardor katba dang ap ïa ka jingtohkit kaba pura.” “Ka PGMOL kan ym kren eiei shuh tat haduh ba kata ka jingtreikam kan da dep.”
U Coote, 42 snem, u dei u nongbishar ha ka Sngi Saitjaiñ, ha ka jingïalehkai jong ka Liverpool, kaba la jop da 2-0 kol pyrshah ïa ka Aston Villa.
U Klopp u la mih noh na ka Liverpool ha kaba kut jong ka samoi ïalehkai ba la dep hadien ba u la don bad ka Liverpool la jan khyndai snem ha Anfield. U Klopp uba dei u nong German u la kynthoh ïa u Coote halor ka jingjia ha ka jingïalehkai pyrshah ïa ka Arsenal ha ka samoi ba la dep ha kaba ka kti jong u Martin Odegaard u rangïalehkai pdeng jong ka Gunners ka la ïakynduh ïa ka bol. U Coote, kum u VAR, um shym la ai jingmut ïa u Chris Kavanagh, u official uba don ha madan, ba un bishar bniah ïa katei ka jingjia. U Klopp u la ong hadien ka jingïalehkai: “Kumno u briew ba don ha ka ophis u lah ban ïohi ïa kata bad um poi sha ka jingrai ban leh ei-ei, ba lehse, lah ka lah ban long kaba kordor ïa u nongbishar ban peit biang?”
U Coote u la long ruh u VAR ha ka jingïakhun jong ka Merseyside Derby ha Goodison Park ha u bnai Risaw 2020 ha kaba u nongap kol jong ka Toffees u Jordan Pickford u la pynmynsaw ïa u Virgil van Dijk u rangïalehkai shakhmat ka Liverpool ha kaba kut ka samoi ïalehkai. Ha kaba ïa u Pickford ym shym la beh noh na ka bynta katei ka jingleh bad um shym la mad ïa ka jingshah pynshitom katkum ki kyndon jong ka Football Association, kata ka lah ban jia tang lada ym shym la ïohi ïa ka jingjia la ka long ha kata ka por ne ha ka por ba la bishar bniah da ka VAR.
