Shillong, Naiwieng 13
Ka Langsning FC ka la jop da 3-2 ha ka jingïakhun pyrshah ïa ka Ryntih FC ha ka OC Blue Shillong Premier League 2024, katba ka Sawmer SC bad ka Nongthymmai SC ki la ïasam mar shi poiñ ha ka Sngi Balang ha SSA Stadium kaba ha First Ground, Polo.
Ka nam jop jong ka Langsning ka la wan urlong lyngba ar kol ba la thep da u Dajiedlang Wanshnong (35 & 70) lem bad kawei pat na u Ronney Chel Khongrangjem (90+1), hynrei u Dameki Khongstia (58) bad u Damonlang Pathaw (63) ki la lah ban pynphai na ka bynta ka Ryntih.
Ha katei pat ka jingïakhun hapdeng ka Sawmer SC bad ka Nongthymmai SC ki la ïakhaid mar 1-1 kol. ka Nongthymmai ka la pynkhih jar nyngkong eh lyngba ka penalty ba la shut da u Ronald Singh Shaikhom ha ka minit kaba 31, hynrei shwa ban wai u Diego Khyriem (90+4) u la lah ban pynïakhaid kylla na ka bynta ka Sawmer.
U Dajiedlang u la long u ‘rangïalehkai ba kynsai na ka bynta ka Langsning bad u la ïoh ban shut na jngai. Une u ‘rangïalehkai u la lah ban pynpra ïa u ‘rangïalehkai shadien u Allen Lyngdoh Nongbri bad kumjuh ïa u rangapkol ka Ryntih u Luckystar Lawai na ka bynta ban ïoh thep ïa ka kol ba nyngkong.
Kumba ka paw kine ar tylli kynhun ki dei kiba don ha ki kyrdan sha trai. Kumta ki la khmih lynti ban wanphai da ka jingkhlaiñ bor na ka bynta ban kiew sha ki kyrdan ba kham shapdeng khamtam ka Ryntih kaba donkam ban pynphai hadien ba u Dameki u la ïoh ïa ka kabu kaba biang bad hadien da u Damonlang, hynrei um shym la lah ban pynurlong.
Dei hadien katto-katne por ba la bteng ïa ka jingïakhun jong ka kylla miet ba ka Ryntih ka la lah ban pynïakhaid kylla lyngba u Dameki Khongstia ha ka minit kaba 57. Kane ka kynhun ka la pynbud biang ïa ka kol kaba ar lyngba u Damonlang Pathaw (63).
Hadien 7 minit u Dajiedlang thep biang sa shi kol na ka bynta ka Langsning. Une u ‘rangïaleh-kai u la duh ei ïa ka hat-trick, hadien ba u Luckystar u la lah ban khanglad na ka jingshah thep ba la shut da utei u ‘rangïalehkai ïa ka penalty.
Shwa ban wai u Ronney u la thep ïa ka kol kaba khatduh hadien ba u Luckystar um shym la lah ban khanglad na ka bynta ban pynlong ïa ka Langsning ban jop syndon.
Lyngba kane ka jingjop ka Langsning ka la lah ban pyllait ïalade na ka jingma ha ka miej kheiñ poiñ naba mynta ka la don ha ka kyrdan ba hynñiew bad kamai 6 poiñ, katba ka Ryntih mynta ka don sha trai.
Shwa ïa kane, u Ronald u la lah ban pynurlong lyngba ka penalty na ka bynta ka Nongthymmai ban ïoh lamkhmat ha ka kylla step. Ka Nongthymmai ka la duh noh ïa uwei na ki rangïalehkai u Michaelson Kurbah hadien ba u la ïohpdiang da ar tylli ki yellow card.
Hadien kane ka jingeh ba ka ïakynduh, hynrei ka liang pyrshah kam shym la lah ban pynphai. Hashwa ban wai artad ba ka Sawmer ka la lah ban pynïakhaid kylla lyngba u Diego na ka bynta ban ïasam mar shi point.
Lyngba kane ka jingïakhaid, ka Sawmer ka dangïai sah ha ka kyrdan balai ha kaba ka la kamai 8 point, katba ka Nongthymmai ka la don ha ka kyrdan basaw bad 7 point.
Kane ka lympung kan sangeh shwa shipor khnang ban ailad ïa ka kynhun ïalehkai ka Jylla ba kan pynkhreh ha shwa ba kan leit shim bynta ha ka National Football Championship na ka bynta ka Santosh Trophy. Kumba ka paw kiba bun na ki ‘rangïalehkai ki dei kiba ïalehkai na ki klob jong ka SPL bad ka Meghalaya kan sdang ïa ka jingïalehkai kaba nyngkong ha ka 20 tarik mynta u bnai.
