Washington, Naiwieng:
U President ka US- u Joe Biden, u la pdiang sngewbha ia u President ban sa long jong ka US- u Donald Trump sha ka White House ha ka Sngi Balang hadien ba ka Kamala Harris kaba long ka kyrtong kaba u Biden u la aiti pateng ia ka bor ban ïakhun ia ka ilekshon President pyrshah ia u Trump ha une u snem, hynrei kaba la shah rem noh ha kane ka ilekshon ba la dep.
Kumta, la ong ba u Biden bad u Trump ki la ia khublei kti markhmat ha katei ka sngi, ha kaba u Biden u la kren shaphang ka jingiatrei lang jong u bad utei u nongialam u ban sa long noh u President ba thymmai jong ka US bad u Biden u la pdiang sngewbha ia u Trump sha ka iing White House da kaba ong ‘Welcome Back’.
U Biden u la don 81 snem ka rta ha une u snem bad u Trump pat u la don 78 snem mynta.
U Biden uba la kynran dien noh na ka jingthmu ban ïakhun ilekshon biang ha kane ka sien, ha u Naitung jong une u snem, u la aiti bad kyrshan noh ia ka Kamala Harris kaba long ka Vice- President jong u hi, ba kan mih bujli na ka jaka jong u ban ïakhun pyrshah ia utei u nongialam barim ka US naka bynta ka ilekshon President ha une u snem.
Hynrei ha katei ka jingiakhublei kti markhmat, u Biden u la pyndem ‘ñiuhmat ha ka por ba u Trump u tur shajan bad peit pyrshah mar khmat bad u.
