Shillong, Naiwieng 14
Shi bynta na ki sienjam ban ïakhun thma pyrshah ïa ka jingjyllei jong u drok hapoh ka Jylla, ka Sorkar ha ka Sngi Palei ka la shim ïa ka rai ban pynbun ïa ki ksew sma dien ban lap ïa ka jingdon jong u drok kumjuh ban buh ïa ki Vehicle Scanning Machine (VSM) kiba khlaiñ ha ki ar tylli khyrdop ba rung sha ka Jylla, kawei ha Ribhoi District bad kawei pat ha East Jaiñtia Hills District.
Ka Sorkar Jylla ka la ïaid shaid-shaid ban rat dyngkhong ïa ka jingkynrei jong u drok ha ka jylla, da kaba pyntreikam ïa ka Drug Reduction Elimination and Action Mission (DREAM) kaba la shong ïa ka jingïalang ba nyngkong hynne ka sngi, ïa kaba la khlieh da u Symbud Myntri Rangbah ba khmih ïa ka Kam Pohïing, Bah Prestone Tynsong, ba la don lang ruh u Myntri ka tnat Social Welfare, Bah Paul Lyngdoh bad u Mission Director, Bah Francis G Kharshiing Ret. IPS, nalor kiwei ki heh ophisar ka Jylla.
U Bah Paul Lyngdoh uba dei ruh u nongaiktien ka Sorkar MDA u la ong ba ka jingbuh ïa ki Vehicle Scanning Machine ha Ribhoi bad ha East Jaiñtia Hills District yn pyndep hapoh ka hynriew bnai ban ïoh bat ïa kino-kino ki kali kiba kit ïa u drok.
U la ïathuh ba ka Sorkar kan pynkhlaiñ bad pynbun shuh shuh ki pulit ha ka Anti Narcotics Task Force (ANTF), bad na ka bynta jong kane la aiti ha ka Director General of Police (DGP) ban pynkhreh ïa ki jingdonkam, bad ïa ki jingdonkam ba la wanrah da ka DGP yn rah ban shim rai pat ha ka Kynhun Myntri (Cabinet).
Shuh shuh u la ong ba na ka bynta ban pynduh jait ïa u drok donkam ban pynkhlaiñ ïa ki Village Defence Party (VDP) ki ban long ki nongpeit pyrman ban ïada na ka jingïoh rung u drok, bad na ka bynta kane yn wanrah ruh ka jingpynkylla ha ka Meghalaya Police Act, 2010.
“Ha Shillong ngi don tang 11 tylli ki kynhun jong ki VDP katba ka jingdonkam pat ka long bun shah ïa kata, ngi la rai ba ka jingdon jong ki VDP ha kawei ka kynhun kan long haduh 15 ngut, ïa kiba ngin hap ban pynbiang ïa ki ‘uniform’ bad ban pynkiew ruh ka jingsiew”, u la ong.
U Bah Paul u la pyntip ruh ba ka Sorkar ka la rai ban pynstet ïa ki mukotduma lyngba ki fast track court, bad na ka bynta kane ka Sorkar kan ïakren ruh bad u Chief Justice ka High Court ban pynstet ka jingbuh ïa kine ki kashari.
“Ki fast tract court ki dei ban shong man la ka sngi ban bishar ïa ki mukotduma kiba hap hapoh ka PITNDPS”, u la ong.
Haba kylli ïa ki jingdawa jong ki kynhun sengbhalang, u Myntri u la ong ba ka Sorkar kan leh ïa la ka jong ka kamram hynrei kan ym leh ïa kano-kano ka kam hapdeng ka jingshah pynbor.
“Kam dei ka jingsngewkhia tang jong kawei ka seng ngi tip ïa kaei kaba ngi leh, ngim trei namar ba pynbor mano-mano hynrei ngi pdiang pat ïa ki jingai jingmut”, u la ong shuh shuh.
Ha kaba ïadei bad ki jaka sumar, u Bah Paul Lyngdoh u la ong ba ka Sorkar kumba ka la kyrshan bad trei lang bad ki shnong, ki balang kumjuh bad ki kynhun treimon sngewbha, ka kloi ban ïarap na ka bynta ki jaka sumar ha kino kino kiba kloi ban ïa ka jaka.
“Kaba kongsan mynta ba ngi hap ban leh ka long ban pyndkut ïa u kynjri uba pynpoi ïa u drok sha kane ka Jylla, hangta kiba kyrni ha u drok kin duna bad ym don shuh syndon”, la ong u Myntri.
