Shillong, Naiwieng 14
Hadien ba la dep ïoh jingkheiñ lut na baroh ki jaka thep ‘vote’, ka jingpoi ki nongthep ‘vote’ ha Gambegre konstitwensi ka la kiew sa kyndiat kata, da 0.9% na ka 90.84% sha ka 90.93%.
Katkum ka jingkheiñ haduh ka por 6 baje janmiet ha ka sngi thep vote ha ka Sngi Balang, ka jingpoi ki nongthep ‘vote’ ka long 90.84%.
Haba ïakren bad u Returning Officer ka Gambegre, u Nipon Hajong u la ong ba hadien ba la dep ïoh jingkheiñ lut na baroh ki jaka thep ‘vote’, ka jingpoi ki paidbah ban thep ‘vote’ ka kiew sha ka 90.93% na ka jingdon ki 33,091 ngut ki nongthep ‘vote’.
Ka Gambegre konstitwensi ka dei kawei na ki konstitwensi ha Rilum Garo kaba ki paidbah ki ju mih bha ban leit thep ‘vote’ ha ki ilekshon jied nongmihkhmat la ka dei ha ka ilekshon MLA ne ilekshon MP.
Ka jingpoi thep ‘vote’ ka long 91% ha ka ilekshon MLA ha u snem 2013, nangta 90.52% ha ka ilekshon MLA ha u snem 2018, bad 90% ha ka ilekshon MLA ha u snem 2023.
Ha ka ilekshon MP Lok Sabha, ki paidbah ka Gambegre kiba leit thep ‘vote’ ki long 81.81% ha ka ilekshon MP ha u snem 2019 bad 83.76% ha ka ilekshon MP ha u snem 2024.
Ha kawei pat ka liang, ki bor pynïaid ilekshon ka West Garo Hills district hapoh ka jingpeit jingkhmih u Returning Officer ki la nang pynkhreh bad pynbit pynbiang ïa ki jingdonkam na ka bynta ka jingñiew ‘vote’ ha Tura ka ban sa long ha ka 23 tarik mynta u bnai.
Ki kor thep ‘vote’ kiba kynthup ïa ki EVM bad VVPAT bad kiwei kiwei ki kor la buh lang ha kawei ka kamra kaba la pynkhlaiñ bha ïa ka jingpahara.
Hadien ba la dep ka jingthep ‘vote’, ki kyrtong bad ki seng saiñ pyrthei kiba ïakhun ha kane ka ilekshon MLA shiteng samoi ki la sdang ban kheiñ jingkheiñ bad lum jingtip na man la ki jaka thep ‘vote’ haba ïadei bad ka jingwan thep ‘vote’ ki paidbah bad sdsng ruh ban kheiñ antad ïa ka rukom ïoh ‘vote’.
Ha kane ka ilekshon shiteng samoi, ka jingïakhun ka long kaba jwat bad ka dei ruh ka jingïakhun na ka bynta ka burom khamtam eh ïa ka NPP bad ka Congress.
Ka Congress ka dei ban jop khnang ban bat biang ïa ka Gambegre konstitwensi kaba la ju mihkhmat da u MLA ka Congress u Saleng A Sangma uba la long mynta u MP ka Tura, katba ka NPP ka hap ban jop ïa kane ka ilekshon kum ka seng kaba don ha ka bor synshar, khamtam haba ka pynïakhun da ka kurim jong u Myntri Rangbah ka Chandee A Sangma kum ka kyrtong.
Ka Congress ka la pynïakhun da u Jingjang M Marak kum u kyrtong bad ka TMC ka pynïakhun da ka Sadhiarani Sangma kaba dei ka kyrtong jong ka All India Trinamool Congress (AITC) bad kaba dei ruh ka hep kynsi jong u Dr. Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla. Kiwei pat ki kyrtong ki long u Bernard N Marak u kyrtong ka BJP uba dei ruh u MDC, nalor ar ngut ki kyrtong shimet u Sengkrabirth M Marak bad u Jerry A Sangma.
