Amlarem, Naiwieng 14
Ka ACP Padu bad Lumpyngngad SC ki la ïoh jingjop, ka Nongshiliang bad Amjajer Rako ki la ïakhaid ha ka jingïalehkai jong ka kyrdan Lower Division, katba ka Jarain CSC ka la ïoh jingjop ha ka Super League.
Ïa kine jingïalehkai la pynïaid da ka Amlarem Sub Divisional Sports Association (ASSA) ha madan Mini Stadium Lajaplem, Amlarem ha ka Sngi Palei.
Ha ka jingïalehkai jong ka Lower Division, ka ACP Padu ka la pynliem ïa ka Amsarim SC da 2-1 kol. Ïa ki kol jong ka ACP Padu la thep da u Banker Tariang (13) bad Stevenson Sumer (42), katba ïa ka kol jong ka Amsarim la thep da u Kynjai Pohtam (20).
Ha ka jingïalehkai kaba bud, ka Lumpyngngad SC ka la pynliem ïa ka Darrang SC da 2-1 kol. Ïa ki kol jong ka Lumpynngad SC la thep da u Journey Rymbai (36) bad Journey Rymbai (42), katba ïa ka kol jong ka Darrang SC la thep da u Mario Rymbai.
Ka jingïalehkai hapdeng ka Nongshiliang bad Amjajer Rako ka la kut da ka jingïakhaid mar 1-1 kol. Ïa ka kol jong ka Nongshiliang la thep da u Abinash Khaii (11) bad Amjajer Rako la thep da u Syrpai Nongrum (15).
Ha ka jingïalehkai jong ka Super League, ka Jarain CSC ka la pynliem ïa ka Pamtbuh SC da 1-0 kol bad ïa kane ka kol la thep da u Kamjoh Shadap (70).
