Shillong, Naiwieng 14
Ka Chairperson jong ka Meghalaya State Commission for Women (MSCW), ka Kong Ïamonlang Syiem ha ryngkat ka jingsynran lang da ki dkhot jong ka Commission ha ka 14 tarik u Naiwieng 2024, ka la leit sha ka Skulbah North-Eastern Hill University (NEHU), kum ka dak ka jingai mynsiem ïa ki samla pule kiba la shong shah thngan ha katei ka jaka kaba la kynjoh mynta sha ka khyndai sngi kynthih ban dawa hiar shuki mardor ïa u Vice-Chancellor ka Skulbah, u Prof. Prabha Shankar Shukla namar ka jingleh shaba palat pud jong u.
Haba kren sha ki lad pathai khubor, ka Kong Ïamonlang Syiem ka la ong ba ka jingwan hiar jong ka sha katei ka jaka ban khmih ïa ki samla pule ka dei namar ka jingsngewkhia jong ka ïa ka koit-ka khiah jong ki khun samla kiba la shong shah thngan ha katei ka jaka.
Ka Kong Ïamonlang ka la ong ba kum ka Commission ka ai ka jingburom ïa ka jingshlur jong ki samla pule ban pynpaw bad dawa ïa ka hok jong ki.
“Ngi la wan namar kum ki para briew ngi don ïa ka jingsngew bad ka jingisynei ïa ki namar ka met jong ki la kumba shiphew sngi mynta ka la tlot”, ong ka Kong Ïamonlang.
Shuh-shuh ka Kong Ïamonlang ka la ong ba kitei ki samla ki la tlot bha ha ka met-ka phad jong ki hynrei ki kwah ban ïakhun beit haduh ban da pynurlong ïa ki jingdawa jong ki. Kumta ka la kyrpad ïa ka Sorkar ba kan kitkhia lem halor kane ka bynta namar kane kan ktah ïa ka koit-ka khiah ki samla pule bad wat ïa ka jingpule jong ki ruh kumjuh.
