Imphal, Naiwieng:
Ka Sorkar Pdeng ka la pyntreikam shuh sa 20 tylli ki kynhun jong ki shipai CAPF ha ka nongbah Imphal kaba ha Manipur kaba la shah ktah jur na ka jingjia jong ki jingïakynad.
Ha kum kane ka por ba dang jur ki kam pyntriem bad ki kam thombor, ka sorkar pdeng ka la rai ban pynbiang shuh shuh sa kumba 20 tylli ki kynhun jong ki shipai Central Armed Police Forces (CAPF) na ka bynta ban lah ban pynneh ïa ka shongsuk-shongsaiñ bad ki jinglong-jingman baroh, la ong u heh jong ka tnat Ministry of Home Affairs (MHA).
U heh ophisar jong ka tnad ki kam pohïing jong ka Manipur, u la ïathuh ba ki 20 tylli ki kynhun jong ka CAPF ka kynthup (kumba 1,700 haduh 1,800 ngut ki shipai) kin sa poi shen sha kane ka jylla bad ïa ki yn sa buh ha ki distrik ba la jyllei ki kam pyntriem jong ki lehnoh.
Katkum ka kyrwoh khubor ba la wan na ka MHA, kaba la ïoh da ka lad pathai khubor bad phah sha u Chief Secretary ka Manipur, Home Secretary, bad Director General of Police, la pyntip ba na ki 20 tylli ki kynhun jong ka CAPF, 15 tylli ki dei jong ka CRPF bad 5 tylli jong ki BSF.
“Ki CRPF kin leit mar mar sha Manipur na Assam katba ki BSF kin leit sha Manipur na Tripura,” la ong ka kyrwoh khubor ba la phah da ka MHA. Ka la kyrpad ïa ka sorkar jylla ban trei kham kloi halor ka jingthmu ban pyntreikam, da kaba ïamir jingmut bad ki kynhun CAPF bapher bapher.
Ka la bynrap ruh ba da ka jingpynrung sa 20 tylli ki kynhun jong ki CAPF, baroh 218 tylli ki kynhun jong ki CAPF, kiba kynthup ïa ki CRPF, RAF, BSF, ITBP, bad SSB kin lah ban ïoh bad ka sorkar Manipur. Utei u heh jong ka tnad kam pohïing jong ka jylla Manipur u la ïathuh ba ka rai jong ka MHA ban buh shuh ïa ki kynhun CAPF ha Manipur ka wan hapoh lai sngi hadien ka jingïasiat ba markylliang ha ka Lah Sngi U Blei hapdeng ki suba lehnoh Kuki bad ki shipai CRPF ha Jiribam distrik. Ki pulit ki la ïathuh ba hadien ka jingjia ha ka Lah Sngi U Blei, ki la don 10 ngut ki briew kiba la shah rahbor bad jah rngai.
U Inspector General of Police (Operations), Manipur u I.K. Muivah, u la ong ba ha ka jingkhynra hadien ka jingjia ha ka shnong Jakuradhor, ha kaba katto-katne tylli ki ïing ki sem ruh ki la shah thang ha ki lehnoh kiba kieng atiar, la lap ar tylli ki met ïap jong ki ‘riew paidbah kiba la tymmen ïa kiba la tip kyrteng kum u Maibam Kesho Singh (75 snem) bad ka Laishram Barel (61 snem).
Kiba la shah pynïap bad kiba jah ki dei kiba la shah rahbor na ka jaka sah ba shipor ba ki la sah hadien ba la jia ki kam thombor kaba don ha katei ka shnong.
U IGP u la ong ba uwei pat u briew la lap ba u dang im bad la pyllait im bad uwei pat u riew paidbah u la wan phai hi dalade sha thanat. Kumba ka long mynta ki don lai ngut ki kynthei bad lai ngut ki khynnah kiba jah rngai bad ka jingthwet ban lap ïa ki ka dang ïaid shakhmat.
U Muivah u la ïathuh da kaba ong ba ha ka Lah Sngi U Blei, ki la don kumba 10 ngut ki lehnoh kiba la shah pynïap ha ka jingïasiat kaba markylliang bad ki CRPF. Hynrei ki heh pulit kham ha shwa ki la pynnbna ba ki la don 11 ngut ki lehnoh kiba la ïap. Baroh ki seng ‘riewlum ha Manipur, kynthup ïa ka Indigenous Tribal Leaders’ Forum (ITLF), ka Kuki-Zo Council, bad ka seng ki samla pule Hmar, ki la ju kam ba baroh kitei ki 11 ngut ki dei ki nongtrei monsngewbha jong ka shnong Hmar.
Ha kajuh ka por, hadien ba la jia ka jingïakynad hapdeng ki jaitbynriew ha Manipur ha u bnai Jymmang jong u snem ba la lah, ka sorkar pdeng ka la buh haduh kumba 60 hajar ngut ki shipai kiba kynthup ïa ki shipai ka tnat Army, ki shipai Assam Rifles, bad ki kynhun shipai bapher bapher jong ka CAPF.
