Shillong Naiwieng 14
U Symbud Myntri Rangbah (Dy CM), uba peit ïa ka tnat Transport, Bah Sniawbhalang Dhar u la ong ba ka Sorkar kam lah ban khang ïa ki briew kiba leit shna ïing thymmai ha ka jaka kaba don ha syndah ka kad liengsuiñ ha Umroi bad ka Sorkar kan sa shim jaka katkum ka jingdonkam ban pynheh ïa ka Kad Liengsuiñ.
U la pynpaw ïa kane halor ka jingthmu jong ka Sorkar Pdeng lyngba ka Airport Authority of India (AAI) ban pynheh shuh shuh ïa ka kad liengsuiñ ha Umroi kaba la pynlong pynban ïa ki trai jaka kiba don jaka ha syndah ka kad liengsuiñ ban tei ïing thymmai.
La ong ba ka jingleh kyrkieh ban tei ïing thymmai ka dei namar ka jingmutdur jong ki trai jaka ba kin ïoh kham bun ka pisa na ka bai shim jaka lada donlang bad ka ïing.
U Bah Sniawbhalang u la ong ba lada ka Sorkar ka dei ban shim ïa kino-kino ki jaka, kan ïaid katkum ki kyndon jong ka jingsiew bai jaka bad lada urlong kumba la thmu ban ym ot shuh ïa ki lum rit kiba don hajan ka kad liengsuiñ, hap ban shim jaka shuh khnang ban pynheh ïa ka ‘runway’ ne ka lynti ban mareh liengsuiñ ha shwa ban her bad ruh ha ka por hiar.
U la ong ba lada ka urlong ka jingthmu ban pynheh shuh shuh ïa ka kad liengsuiñ, yn dang donkam ban shim jaka sa kumba 16 akar khnang ban ïoh pynjrong shuh shuh ïa ka ‘runway’.
Hadien ba ka Sorkar ka la pynbna ba ka donkam jaka shuh ban pynheh ïa ka kad liengsuiñ, kiba bun na ki trai jaka ha Umden Arka marjan bad ka Umrynjah ki la khih khohreh ban shna ïing thymmai.
Kiba bun ki la ïathuh ba kane ka jingshna ïing thymmai ka dei hadien ba la ïoh jingtip ba ka Sorkar ne AAI kan kheiñ dor kham heh lada donlang bad ka ïing haba siew bai shim jaka. Hynrei lada dei tang ka jaka suda khlem don ïing, ka dor jong ka bai shim jaka kan kham duna ha ka por ba ka Sorkar ne ka AAI kan ai jingkheiñ.
Dang shen, la ïohi ba ka rukom shna ïing thymmai ka long kaba leh kyrkieh haduh katta-katta ha kaba ki trai jaka kiba shna ïing ki la bthah ba dei ban pyndep noh kloi kloi shwa ba ka Sorkar ne ki briew ka AAI kin wan ban khmih ïa ka jaka kaba don ha syndah jong ka kad liengsuiñ.
Kane ka jingshna ïing thymmai ka la pynlyngngoh shi kat dei namar tang na ka daw ban ïoh kham bun ka pisa, la tei ïa ki ïing paki bathymmai wat lada ym pat donkam ban shna ïing.
Kum ban pynkynmaw, ka AAI ka donkam jaka shuh palat 20 akar na ka bynta ban tei kham pynheh ïa ka kad liengsuiñ ha Umroi na ka bynta ban shna pynjrong shuh shuh ïa ka lynti ban mareh liengsuiñ ha shwa ban her bad ruh ban kham suk ïa ki liengsuiñ ha ka por hiar.
