Nongpoh, Naiwieng 15
U Bah Mayralborn Syiem, MLA jong ka Nongpoh konstitwensi mynta ka sngi u la lum jingïalang ïa ki Karikor ka tnad Public Health Engineering (PHE), Nongpoh Division, ka kompani kaba pyntrei bad ki nongïalam jong ki shnong kiba hap ha ka sor Nongpoh ban khmih bniah bad ïakren halor ka jingpyntreikam ïa ka skhim sam um bathymmai jong ka sor Nongpoh, ka Greater Nongpoh Water Supply Scheme (GNWSS) kaba la ïaid shaid-shaid mynta ha ka shnong Mawdiangum.
Kum ban shu kdew, katei ka skhim sam um bathymmai jong ka sor Nongpoh kaba yn sa tan um na ka wah Umran kaba hap ha ka shnong Nongthymmai Umsning ha ka jingjngai kumba 22 kilometer eiei, ka dei kaba la mang tyngka lyngba ka skhim Jal Jeevan Mission (JJM) ha ka jinglut kaba la kot sha ka T. 103 klur bad ïa kane ka kam la ïoh ban pyntrei da ka kompani BAC Infratech.
Kum shi bynta ban pynthikna halor ka jingïaid beit ïaid ryntih jong ka jingpyntrei ïa kane ka skhim, na ka liang u Bah Mayralborn Syiem, MLA jong ka Nongpoh konstitwensi ha ryngkat ki Karikor jong ka tnad Public Health Engineering (PHE), Nongpoh Division ki la pynlong ruh ïa ka jingleit jurip ïa ka jngpyntrei ïa katei ka skhim sam um halor jong u lum uba don ha ka shnong Mawdiangum ba lah ruh ban ïohi kyndiang ïa ka sor Nongpoh baroh kawei.
Haba kren sha ki lad pathai khubor, u Bah Mayralborn Syiem u la ong ba wat la ki don ki jingthut ha ka jingpyntrei ïa katei ka skhim namar ki daw kiba bun bad pynpaw ïa ka jingsngewnguh ïa U Blei ba wat hapdeng kita ki jingleh uba la plie lynti plie lad ba kane ka skhim ka la ïaid shakhmat bad ai jinghun kumba la sakhi mynta ka sngi.
U Bah Mayralborn Syiem u la pyntip ruh ha katei ka jingïalang kaba la pynlong ha ka Conference Hall jong ka shlem treikam District Rural Development Agency (DRDA), na ka liang jong ki nongïalam shnong ki la ai mynsiem halor ka jingpyntrei ïa kane ka skhim bad ki don ruh kiba la pynpaw ïa la ki jingeh bad kum u nongmihkhmat hi un shimkhia ban ïaleh katba lah ban pynbiang katba lah ïa kitei ki jingduna ryngkat bad ka tnad PHE bad ka sorkar jylla hi khnang ba ki paidbah kin ïoh jingmyntoi.
U la ïathuh ba ka jingïoh ïa kane ka skhim ka dei ka jingdawa ka por kaba kum ka sor Nongpoh ka la nang roi nang ïar kat nang mih ki sngi ki por lyngba ka jingdon ki longïing, ka jingnang bun ki shlem treikam, ki dukan, ki skul bad kiwei kiwei.
Ha kane ka sngi u Bah Mayralborn Syiem, u la ai khublei kyrpang ruh ïa ki Karikor ka tnad PHE kiba la shimkhia ban khmih bniah ïa ka jingpyntrei ïa kane ka kam ba kan ïaid beit ïaid ryntih bad ruh ïa ka kompani kaba pyntreikam bha ïa kane ka skhim bad ai ruh ka jingkhublei sha ki shnong ki thaw ki ban sa ïoh ïa kane ka skhim umbam-umdih ha man la ki thliew ïing.
Na ka liang u Bah U. Kurbah, EE ka tnad PHE Nongpoh Division u la pyntip ba ka jingpyntrei ïa kane ka skhim ka la dep kumba 65% eiei bad kaba sah ka dei satang ka jingpynbiang ïa ki pipe um sha ki shnong (Distribution Line) ka ban sa sdang noh ha kine ki bnai ki ban sa wan da kaba pyntip ruh ba kiba bun ki top um ha ki shnong la dep ban shna lait noh satang katto-katne tylli ki shnong.
U la pyntip ruh ba kiwei de ki kam kiba dang sah ki dei ban pyndep kloi noh ïa ka Treatment Plant (TP) bad ban pyndait ïa ki kor ki bor (Machineries & Equipments) bad ba kum ka tnad hi ka dap da ka jingsngewkmen halor ka jingkhia jong u MLA ïa kane ka kam bad kan bthah ïa ka kompani ba pyntrei ïa kane ka kam ba kan pyndep kloi katba lah.
