Jowai, Naiwieng 15
U Phang Sumer u la ïoh ‘hat trick’ bad pynlong ïa ka Demthring ban thep kol kput haduh 10-0 kol pyrshah ïa ka Sailung Ialong ha ka jingïalehkai Super Division Football Tournament-U Kiang Nangbah Memorial Trophy.
Ïa kane ka lympung ïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium, Jowai ha ka Sngi Thohdieng.
U Phang Sumer marwei u la ïoh thep kol ha ka minit kaba 13, 20, 44 & 51, katba kiwei hynriew kol la thep da u Marshial Nongrum 19 & 49, Justerwell Gham 57, Willson Dkhar 75, Jendeng Mukhim 76 bad Ksankupar Khongmalai 80.
Ha shwa kane, ka Wahïajer ka la pynliem ïa ka Mukhla Raij da 4-0 kol. Ïa ki kol jong ka Wahïajer la thep da u Riburom Jat (7), Pynkhreh Talang (71), Nicky o chwa Pakma (77) bad Niwan o Gatphoh (87).
Ka Demthring lyngba kane ka nam jop ka la ïoh 7 poiñ na saw sien ïakhun, katba ka Sailung Ialong kam pat ïoh poiñ eiei.
Ha ka 18 tarik Naiwieng ka jingïalehkai kan long hapdeng ka Shangpung Lumiawmushai bad 7 Wasa ha ka por 11.00 baje mynstep. Ka Ladthadlaboh bad Nangbah Mulang ha ka por 2.00 baje nohphai sngi.
