Shillong, Naiwieng 15
Ka Nongkseh SC ka la ïoh jingjop ha ka jingïakhun pyrshah ïa ka Mawkhar SC da 3-1 kol ha ka jingïalehkai ba nyngkong jong ka lympung SSA 1st Division Football League 2024 kaba la long ha ka Sngi Thohdieng ha madan SSA Ground ha ka por 12:15 nohphai sngi. Ïa ki kol jong ka Nongkseh SC la thep da u Fastborn Khongsit (21), u Chesterpaul Lyngdoh (64), bad u Samphrangshai Rani (87) bad na ka liang jong ka Mawkhar SC la thep da u Rickyshan Warjri (43).
Ka jingïalehkai kaba bud ba la long ha kajuh ka sngi, kajuh ka jaka, ha ka por 3:15 nohphai sngi ka long hapdeng ka Mawtawar SC pyrshah ïa ka Malki SC. Ka Mawtawar SC ka la jop da 4-1 kol. Ïa kine kol la thep da u Fedrick Lyngdoh (1), Larry C Mawlong- (12), Thomos Dkhar (75) bad u Rishan M Umlong (88) na ka bynta ka Mawtawar bad shi kol jong ka Malki SC la thep da u Majumi Lando Tariang (85).
Ha ka Sngi Saitjaiñ ka jingïalehkai ka long hapdeng ka Sohryngkham SC pyrshah ïa ka Umphyrnai SC ha madan SSA Ground ha ka por 2:30 nohphai sngi.
