Khliehriat, Naiwieng 15
Ka Shnongpdeng SC ka la ïoh jingjop ha ka Upper Division katba ka Samanong SC, Mawlong SSC bad Syntong Welfare ha ka Lower Division Football Tournament ba la pynïaid da ka Amlarem Sub Divisional Sports Association (ASSA) ha madan Mini Stadium Ladjaplem, Amlarem ha ka Sngi Thohdieng.
Ha ka jingïalehkai jong ka Upper Division, ka Shnongpdeng SC ka la pynliem ïa ka Amkoi SC da 1-0 kol lyngba ka kol ba la thep da u Dame Kongwang ha ka minit 16.
Ha ka Lower Division, ka Samanong SC ka la pynliem ïa ka EYC Amjalong da 3-1 kol.
Ïa kine kol la thep da u H. Suting (11), Mirot Bareh (24) bad Jaijop Suting (44) bad ka shi kol jong ka EYC Amjalong ka thep da u Jim Reaves Lynthong (17).
Ha ka jingïalehkai kaba bud, ka Mawlong SSC ka la pynliem ïa ka Iai Kyntiew Pamtbuh da 4-0. Ïa kine ki kol jong ka Mawlong SSC la thep da u Synchetmon Lamat (7), Rechard Sungoh (38), Remdor Lamat (53) bad Samuel Lamat (57).
Ha kawei pat ka jingïalehkai, ka Syntong Welfare ka la pynliem ïa ka FYSC Amtapoh da 1-0 kol lyngba ka kol ba la thep da u Kupar Langshiang.
Ha ka Sngi Saitjaiñ ka jingïalehkai ha Lower Division kan long hapdeng ka LM Amsyrwai pyrshah ïa ka Twah U Sdiah ha ka por 10.15 mynstep, ka Traki Mawngap pyrshah ïa ka Ryntih Amsohrhong ha ka por 11.40 mynstep, ka Nongbareh Lyntiar pyrshah ïa ka FB Satpator ha ka por 1.00 baje nohphai sngi.
Katba ha ka Super Division ka jingïalehkai kan long hapdeng ka YC Pdengkarong pyrshah ïa ka Amlarem SC ha ka por 2.30 nohphai sngi.
