Shillong, Naiwieng 15
U Deputy Chief Exe-cutive Member ka Khasi Hills Autonomous Dis-trict Council (KHADC), Bah Pynshngaiñ N Syiem u la maham ïa ki kynhun kiba leit tur sha katei ka shlem treikam ki MDC ha ka lynti ka bym dei kumba la leh da katto-katne ki kynhun ha ki sngi ba la dep.
Ka Hynñiewtrep National Youth Move-ment (HNYM) ha ka Sngi Palei ka la leit ban pynlong da ka jingïakhih ka bym poi pyrkhat ha phyllaw jong ka KHADC, ha kaba ki la jynrat ruh ïa ka khyrdop ban rung shapoh katei ka shlem treikam.
Haba kren ha ka Sngi Thohdieng, u Bah PN Syiem u la ong ba na ka liang ka KHADC kan hap ban shong pyrkhat thymmai namar lada bteng ban jia kumne kan ktah shibun ïa ka jingtreikam jong ka KHADC.
“Ha kaba ïadei bad ka jingwan ki seng kiba shu shim kabu ha ka lynti ka bym dei, nga tharai ka Executive Committee kan hap ban shong pyrkhat thymmai, namar lada ka ïai jia shi jia kumne kan ktah shibun ïa ka jingtreikam ha ka Council bad pynjulor ruh ïa ki jingdon-jingem jong ka KHADC”, u la ong.
U la ong ba ha ka jingjia ha ka Sngi Palei ba la wan ban pynkhihwin da ka seng HNYM, ka Council ka la pynkhreh ban mudui syndon da ka ejahar sha ki pulit, hynrei namar ba kam pat shym la don kano-kano ka jingpynjulor ka KHADC ka la sangeh noh.
“Ngi la ïakren hapdeng jong ngi ban ujor noh da ka ejahar halor ka jingpynkhih ïa ka khyrdop hynrei namar ba kam shym don ka jingjulor ngi la sangeh noh, lada dei ba don ki dak julor wat kaba tang malu-mala ruh nga tharai ka EC kam don lynti da kumwei pat lait tang ban ujor beit da ka ejahar ha ki pulit”, u la ong.
U Symbud CEM u la ong ruh hadien ba ïai mih kum kine ki jingjia na ka liang ka Executive Committee kan hap ban wanrah noh ka jingpyrkhing ïa ka jingrung jingmih jong ki briew ha phyllaw ka KHADC, namar kumba ka long mynta ka la long laitlan palat.
“Na ka bynta ka jingshngaiñ bad ban ïada ïa ki nongtrei bad kumjuh ban ym don ka jingshah pynjulor ki jingdon-jingem hapoh ka Council, lehse ngin hap ban pan bor pahara na ka Sorkar ruh”, la ong u Bah Pynshngaiñ.
