Shillong, Naiwieng 15
Ka jingpynbna ïa ki tarik jong ka National Games ha Uttarakhand ha u snem ban wan ka la pynmih ka jingïakynad kaba thymmai hapdeng ka President ka Indian Olympic Association (IOA) ka P.T Usha bad ki dkhot jong ka executive committee jong ka.
Dang shen ka Usha ka la pynbna ïa ki tarik na ka bynta ka jingïalehkai kaba 38th National Games (ka ban sdang naduh 28 tarik u Kyllalyngkot haduh 14 tarik u Rymphang) bad ki ‘komiti ba kongsan’ ki ban peit ïa ka jingpynkhreh bad jingpynïaid jong kane ka lympung. San tylli ki komiti, kynthup ïa ka Games Technical Conduct Committee ba la khlieh da ka Sunaina Kumari jong ka Bowling Federation of India, katkum ka shithi jong ka Usha sha u Myntri Rangbah ka Uttarakhand, u Pushkar Singh Dhami ha ka 6 tarik mynta u bnai.
Hynrei ym don iwei ruh na ki dkhot jong ka EC, kiba don ha ka jingïakynad bad ka Usha ki ban shah kynthup hapoh kitei san tylli ki komiti kiba kham bunsien ki kynthup tang ïa ki heh jong ki synjuk ïalehkai bapher bapher jong ka ri bad ki synjuk ïalehkai jong ka Olympic.
La ïathuh ba u Joint Secretary ka IOA bad uba long mynta kum u CEO ba shipor, u Kalyan Chaubey, u la pyntip ha ka 12 tarik u Kyllalyngkot jong u snem 2023 ha ka shithi sha u Director of Sports, ka Uttarakhand ba ka IOA ka la rai ba u Joint Secretary jong ka u Alaknanda Ashok “un ïatreilang bad ka Sorkar jong ka Uttarakhand ha kaba ïadei bad ki jingpynkhreh jong kine ki lympung ïalehkai”.
Ïa kane la rai ha ka jingïalang jong ka EC ha Meerut ba la pynïaid da ka Usha, ha kaba la ïakren halor ka jingpynslem ïa katei ka lympung ïalehkai. Ka jingïalang ka la long hadien shibnai jong ka ilekshon jong ka IOA. Hynrei u dkhot ka EC u Alaknanda um don ha kano-kano ka komiti ba la mynjur da ka Usha.
Kumta ha ka Lah Sngi U Blei, u Alaknanda u la thoh sha ka Usha da kaba ong ba ki mat jong ka National Games, kynthup ïa ki tarik, kim ju wan mih na ka bynta “ki jingïakren ne jingmynjur ka EC jong ka IOA lane ka General Council”.
“Kum kine ki rai shiliang ki long pyrshah ïa ka riti pynïaid kam jong ka IOA”, la phah jingthoh u Alaknanda ha ka shithi sha ka Usha.
Uwei u dkhot ka EC u la ong ba kiwei ki dkhot ruh ki don kajuh ka jingmut ba ka Usha ka shim rai hi da lade khlem da ïamir jingmut lang. “Ka don ka jingsngewthuh bakla ha kaba ïadei bad ki tarik ruh. Ka jingthoh ba la pynmih da ka Usha haba pynsngew ïa ki tarik ba la tyrwa ban pynlong ïa katei ka lympung la kdew ruh ba kan don ka jingdonkam ban pynkylla ïa ki tarik namar ba ka India kan ïashim bynta ha ka Asian Winter Games (7-14 tarik u Rymphang). Balei phi pynmih ïa ka jingkulmar kaba khraw ïa baroh? Kan pynthut ïa ka jingpynkhreh”, la ong uwei u dkhot ka EC.
