Shillong, Naiwieng 15
U Prof. N. Saha u la shimti ïa ka kam kum u Vice-Chancellor (VC) ‘In-charge’ jong ka North Eastern Hill University (NEHU) ha ka janmiet Sngi Thohdieng.
U Prof. Saha ha kajuh ka por, uba dei ruh u nonghikai ne Professor ba la rangbah tam jong ka skulbah u la shimti ïa kane ka kam hadien ba u VC Prof. Prabha Shankar Shukla u la shim shuti naduh ka Sngi Thohdieng haduh ka 29 tarik u Naiwieng.
Ïa u Prof. Saha la synran lang da ki dkhot ka NEHUTA, MeTTA-NEHU, NEHUSU, ka KSU NEHU-Unit bad ka NEHUNSA sha ka shuki jong u.
Haba ai jingkren sha ki nonghikai, samla pule bad ki nongtrei (bym dei nonghikai), u Prof. Saha u la ong ba un pyrshang katba lah ha ka kyrdan jong u ban pynbeit ïa ki jingeh bapher-bapher kiba don ha ryngkat ka jingïatreilang bad ki nonghikai, samla pule bad ki nongtrei (bym dei nonghikai) ha kano-kano ka bor kaba rit kaba u don kum u VC ‘In-charge’.
“Ngan ym lah ban pynbeit ïa ki jingeh kiba don ha ka shisngi. Ïa ki jingeh yn hap ban pynbeit suki-suki na kawei ka bynta sha kawei pat”, u la ong.
Haba kdew ba u don ka jingïadei kaba la slem bad ka skulbah – kata naduh u snem 1980, u la ong ba u la pyndep ïa ka jingpule jong u na kane ka skulbah haduh ba un da long u nonghikai.
“Ha ki 37 snem jong ka jingshakri jong nga, nga la ïohi lut ïa ki jingkiew-jinghiar jong ka skulbah. Nga la ïohi ïa ka bynta kaba bha tam bad kaba sniew tam kumjuh. Ka long kaba sngewsih shi kat dei ban ïohi ïa ka skulbah ha kane ka kyrdan jong ka jinglong-jingman,” ong u VC ‘In-charge’.
Na ka liang u Prof. Saha u la kyrpad ïa ki samla pule kiba dang don hapdeng ka jingïakhih ban weng noh ïa ka jingïakhih shah thngan ba khlem buh por (jong ki) naba u la sakhi kumno ki la mad jingeh naduh ka sngi banyngkong khamtam ha ka jingkhriat jong ka suiñ bneng.
“Ngam don lad shuh da kumwei pat hynrei ban pdiang ïa kane ka jingkitkhlieh namar katkum ka aiñ bad ki aiñ jong ka skulbah, u Professor uba rangbah tam u kylla long u VC ‘In-charge’ ha ka jingbymdon jong u VC”, u la ong.
Shuh shuh u Prof. Saha u la bynrap ba u kwah ba ka burom jong ka skulbah kan khie im biang sa shisien.
Ha kawei ka liang, ki samla pule ka skulbah wat la ki la pdiang ïa ka jingshimti u Prof. Saha kum u VC ‘In-charge’ hynrei kim pat sangeh ïa ka jingïakhih shah thngan katba ka tnad pule-puthi ka Sorkar Pdeng kam pat weng ïa u VC ba mynta.
