Shillong, Naiwieng 17
Wat la ka Meghalaya ka la shah rem ha ka Railways da shi inning bad 155 run ha ka lympung ïalehkai Col CK Nayudu Trophy, hynrei u kapten ka kynhun ïalehkai ka Jylla u Kevin Christopher u la lah ban pynpaw ïa ka jingtbit da kaba khyrwit ïa ka spah run.
U Kevin dangshen u la duh noh ïa la u kpa ba ïeit eh, hynrei u la ïai bteng ban mihkhmat ïa ka kynhun U-23 ka jylla. Ha ka pali ba nyngkong jong ka Meghalaya pyrshah ïa ka Railways ha Rajkot u la ïoh 112 run na 162 tylli bol kaba kynthup ïa 20 tylli ki ‘four’ bad 2 tylli ki ‘six’. Haba kheiñ lang baroh ka Meghalaya ka la ïoh 227 run.
“Ngi ai khublei ïa u Kevin na ka bynta ka shap run kaba itynnad jong u pyrshah ïa ka Railways ha ka CK Nayudu Trophy,” la ong u President ka MCA u Nababrata Bhattacharjee. “Ka long ka burom kaba khraw ïa u kpa jong u, uba la khlad noh.”
Ha katei ka jingïakhun ka Railways ka la ïoh 521/9 kaba long kaba heh duh ban ïoh run ha ka jingïalehkai ba nyng -kong jong ka, katab ïa ki 227 run la kamai da ka Meghalaya ka la long kaba lyngkot eh. Kumta ha ka inning kaba ar ka Meghalaya ka la shah pynkhyllem baroh ki nongtied n aka bynta ban kamai tang 139 run, kaba la ai jingjop ïa ka Railways.
Ha katei ka ining kaba ar u Rohit Kr Yadav u la long u nongtied ba khlem shah pynhap ha kaba u la tied 65 na ki 137 bol. U nongkawang bol ka Meghalaya u Abhishek Kumar u la khur 4/104 ha ki 26.5 over.
