Shillong, Naiwieng 17
Ki saw kol ba la thep da u Wallambha Kharpran ki la biang pura ïa ka Sohryngkham SC ban pynliem noh ïa ka Umphyrnai SC da 5-1 kol na ka bynta ban ïoh jingjop ha ka lympung ïalehkai First Division Football League 2024 ba la pynïaid da ka Shillong Sports Association ha ka Sngi Saitjaiñ.
Ha katei ka jingïakhun kaba la long ha SSA Stadium kaba ha Polo, u Wallambha u la ïoh ban thep ha ka minit kaba 46, 66, 75 & 81 bad ïa kawei pat la thep da u Pynshongdor Pyngrope (38). Na ka liang ka Umphyrnai ka la pynphai kylla shi kol lyngba u Roberstar Malngiang (61) shwa ba kan mad ïa ka jingshah rem.
Ka jingïalehkai ha ka Lah Sngi U Blei kan long hapdeng ka Pohkseh SC pyrshah ïa ka Malki SC ha ka por 2:30 nohphai sngi.
