Nongstoiñ, Naiwieng 17
Ka Federation of Khasi Jaiñtia and Garo People (FKJGP) West Khasi Hills District ka la ïoh ban jied ïa ki nongkitkam bathymmai jong ka seng na ka bynta ka samoi treikam 2024 haduh 2027 ha kaba u President ka FKJGP Sengkmie u Bah Dundee Khongsit u la ïoh pynskhem ban pyntian smai ïa ki nongkitkam bathymmai.
U samla Pynshailang Kharbani u la shimti kum u President ka FKJGP West Khasi Hills, u Williston Walker Syiem kum General Secretary, Vice President Bah Cary Oscar Kharmuttee bad Bah Serbilin Lyngdoh lem bad kiwei kiwei ki nongkitkam.
U Bah Dundee haba ai jingkren u la ong, ka FKJGP ka kwah ban don ki nongïalam babha bad shemphang, ym ban shu don bun tang ki nongïalam khlem da lah ban trei bha ïa ka kam. U la ong ruh ba ki nongïalam kiba khraw kim kwah ban ïalam ïa ki paidbah da ka mon jong u paidbah hynrei da ka lynti kaba ki ïohi kumno ban ïalam ïa ki.
“Nga kwah ba ki dkhot ka FKJGP West Khasi Hills District kin don ka jingieit ïa ka jaidbynriew, da kaba kin sdang da kaba ieit shuwa ïalade, ieit shuwa ïa ka ïing ka sem ka jong phi kumta ter ter ban sdang ïa ka jingshakri ïa ka shnong ka thaw bad ïa ka ri bad ka jaidbynriew hi baroh kawei,” ong u Bah Dundee.
U la ong ruh ba ka long lehnohei bad kaba sngewsih khamtam ïa ki nongïalam ka FKJGP lada kum ka seng ka ïoh ban pynlong ïa ka jingïalang pynskhem bad ai mynsiem ïa ki nongkitkam hynrei lada long pynban kum ki langïong ha ka ïing ka sem ha ka shnong ka thaw.
Na kata ka daw ki nongïalam ka WKH ki dei ban long ki nuksa ban long u thyrnia ban ïalam ïa ki dkhot ka seng bad ban ïalam ïa ki khun samla, bynrap u Bah Dundee.
“Ka dei ka por ba bun ki khun samla ki ïakynduh ïa ki jingeh, ka jingeh ha ka jingbym ïoh kam ïoh jam bunsien ki khun samla ki shah ïalam bakla noh ha ki jingsniew kiba kha roi ha ka imlang ka sahlang ka jong ngi ha kane ka por kaba mynta, kum ki dkhot ka FKJGP kane ka dei ka bynta kaba kongsan eh ba phi hap ban kren bad ïalam lynti ïa ki khun samla ha kano ka lynti kaba ki dei ban ïaid,” ong u Bah Dundee.
Katba u samla Pynshailang Kharbani, President ba thymmai ka FKJGP WKH haba kren ha katei ka sngi u la pynsngew ba ka seng kan kyrsiew thiah ïa ka Sorkar ban sdang biang ïa ka kam pynbeit pud ha ka wat kaba ar namar la ïohi ba ka Sorkar ka dang ïai shoh samthiah haduh mynta. U la kren ruh halor ban buddien ïa ki kam pynroi ba dang sahteng ha West Khasi Hills kum ki surok, ki jaka sumar, ka jaka pule, ka kam rep kam riang bad kiwei kiwei.
U la ban jur ruh ïa ki para nongïalam bad para dkhot ba ki dei ban pynthikna ba ka jingdon ha ka FKJGP kan ai jingshngaiñ ïa ki paidbah bad ka imlang sahlang.
Ha katei ka sngi pyntian smai, nalor u President ka FKJGP Sengkmie la wan ban sakhi lang ruh da ki nongïalam ka Sengkmie ba kynthup ïa u General Secretary Bah Eldie Newton Lyngdoh, Bah Elton Cliff Warjri, Senior Vice President, Bah Kitboklang Nongphlang, Vice President, ki nongïalam ka KSU WKH bad HNYF, ki dkhot jong ka FKJGP na kylleng ka West Khasi Hills, ki bahaïing bahasem jong u Bah Palawanbor Syiem (bam kwai ha dwar u Blei) bad kiwei kiwei.
Shuh shuh ha katei ka sngi, ka FKJGP West Khasi Hills ka la ïoh ruh ban pynkup burom ïa ki nongkitkam barim jong ka seng kumjuh ïa ki dkhot jong ka seng kiba don bynta ban ïarap lem ban ai snam ïa ki para doh para snam kiba donkam snam.
