Lucknow, Naiwieng:
U heh nongïalam jong ka seng Samajwadi Party (SP) u Akhilesh Yadav ha kine ki khyndiat sngi ba la leit u la ïathuh lypa ïa ka jingjop jong ki kyrtong jong ka INDIA Block, da kaba ong ba ka jingthep vote ban wan ha Uttar Pradesh kan ai ïa ka khubor kaba khlaiñ na ka bynta ka ilekshon sha ka ïingdorbar thawaiñ jong u snem 2027 ha kane ka jylla.
“Kaei kaba u rit paid u lah ban khmih lynti na ki briew ki bym shym la pyndep ïa ki jingkular bad ki bym lah ban leh ha ki snem ba la dep”, u la ong.
Haba kren ha ka jingïalang paidbah ha ka shnong Rudapur na ka bynta u kyrtong jong ka seng Mujtaba Siddiqui, u la kynnoh, “Ka kam, ka jingïatylli bad ka jingïadei paralok kim don hangno hangno ruh ha ka mat ïakren jong ka seng Bharatiya Janata Party kumba ka paw shai na ka jingsynshar jong ki.”
Haba ai khublei ïa ka rai ba dang shen jong ka ïingbishar Apex halor ka jingleh ïa ki Bulldozer, u heh SP u la ong, “Ngi dei ki paidbah kiba bud ïa ka Samajwad (Socialism) bad ngim lah satia ban pdiang ïa ka Bulldozer kum ka atiar ban ïoh ïa ka hok.”
Haba wan hiar thma pyrshah ïa ka seng synshar, u la kynnoh ba ka ju ïalehkai bad ka lawei jong ki samla ha ka jylla da kaba “thmu ban ailad ïa ki kot ki sla jong ki eksamin thung kam namar ban pynthikna ba ki kam na ka bynta ki samla kam ju don ha ka mat ïakren jong ki bad da kaba leh kumta ki la buh ïa ka lawei jong ki ha ka jingdum”.
“Ka khana sah kynmaw ka pyni ba man la ka por ba mih ki kot ki sla, ki jingbym ïahap ha kaba pynlong ïa ki eksamin thung kam haduh ban pynkynriah ïa ki tarik eksamin ne ka jingpynsangeh ïa ki eksamin hi ki la jia, ki briew jong ka BJP ki la donkti ha ka”, la kynnoh u Akhilesh.
U la kynnoh ba ki briew jong ka BJP ki don shadien jong ki jingjia kiba kyntait ïa ki jingmyntoi jong ka jingbuh kyrpang ïa ki samla, da kaba iehnoh ïa ki jingmih jong ki eksamin thung kam khlem da pynbna bad wat ban pynsahkut ïa ki jingpynrung kam ha ki mukotduma ha ki ïingbishar da kaba ïalehkai bad ka lawei jong ki samla ha ka rukom kaba ishyrkhei.
“Ki nongrep ki la shah thok bad ka jingkyrmen jong ki ban ïohi ïa ka jingkiew ha ka jingmih bad ka jingïohnong jong ki ka la jah noh wat hapdeng ki jingkular ba jrong jong ka sorkar BJP ban pynkiew ar shah ïa ka jingïohnong jong ki. Ki nongrep ki la shah iehnoh khlem jingïarap ban ïada ïalade,” u la kynnoh.
Shwa kane, u heh nongïalam ka SP u la sdang ïa ka jingkren jong u da kaba kyrshan ïa ki nongïakhun kiba pynkhihwin ha ophis jong ka UPPSC da kaba kynnoh ba ki jingdawa jong ki ki long kiba hok.
“Bteng ïa ka jingkhih haduh ban da pyndep ïa ki jingdawa”, u la ong. U Yadav u la ong ba tang kawei ka daw kaba la pynlong ïa u ban kiar na kaba leit sha katei ka jaka pynlong jingïakhih ka long ban khanglad ïa ka sorkar ban khot ïa katei ka jingïakhih kum ka jingkynnoh kaba don jingthmu ha ka saiñ pyrthei.
U la kynnoh ba namar ka jingtieng ïa ka jingshah rem ha ki ilekshon shiteng samoi, ka BJP ka la ïoh wat ban pynjlan ïa ka tarik thep vote naduh ka 13 tarik u Naiwieng haduh ka 20 tarik u Nailur.
“Kito kiba la pynkynriah ïa ka ilekshon ki la shah rem ha ka ilekshon kaba shah ktah jur. Haba ki jingwad bniah hapoh ki la pyni ba ki la buh ban rem ha Ayodhya (Milkipur), ki la pynsahkut ïa ka tarik thep vote jong ka bad haba ki tieng ban duh lut ïa ki seat, ki la pynkynriah noh ïa ki tarik thep vote. Katba ki nang pynjlan por, katta kin nang pynkut noh da kaba rem ha ki ilekshon shiteng samoi, u la pynshisha. U heh ka SP u la kynnoh shuh shuh ba ki paidbah ka Phulpur ki la rai ban pynliem ïa ka BJP namar baroh ki tip ba ka jingthep vote ha Lok Sabha halor katei ka shuki la jop da u kyrtong jong ki hynrei “namar ki jingbym ïahap tang ka jingjop ka la kylla long ka jingduhnong da ka jingïarap jong ki heh sorkar”.
“Ha kane ka kynti ngin sa pynrung kyrteng ïa ka jingjop kaba sahkynmaw”, u la ong.
