Jowai, Naiwieng 17
Ka Chutwakhu SC ka la long ka lahduh ha ka lympung ïalehkai First Division Football Tournament na ka bynta ka 12th Chatister Kharkongor Memorial Trophy ba la pynïaid da ka West Jaiñtia District Sports Association (WJDSA).
Kane ka nam jop ka la wan urlong hadien ba lah ban pynliem noh ïa ka Mooknor Thadmuthlong da 3-1 kol ha ka jingïakhun kaba la long ha ka Sngi Saitjaiñ ha Kiang Nangbah Stadium kaba ha Jowai.
Ha kane ka jingïakhun final baroh ar tylli ki kynhun ki la long kiba ïabiang bor bha ha kaba ym shym la don ba lah ban thep kol ha ka kylla step. Dei ha ka kylla miet ba ka Chutwakhu ka la ïoh ban pynkhih jar nyngkong eh lyngba ka penalty ba la shut da u Luckyness Khyriem ha ka minit kaba 65. Kane ka shi kol ka la nang pynïoh mynsiem ïa kane ka kynhun bad tang hadien katto katne por ka la thep biang ïa ka kol kaba ar lyngba u Gladio Susngi ha ka minit kaba 82.
Watla ka Mooknor Thadmuthlong ka la shah thep haduh ar kol, hynrei ka la lah ban pynphai kylla shi kol lyngba ka penalty ba la shut da u Rimiki Suchiang ha ka minit kaba 85. Hashwa ban wai ka Chutwakhu ka la thep biang sa shi kol lyngba u Faithful Bthuh (90) kaba la biang pura ba kan rah syndon ïa ka nam lahduh.
Ïa ka nam Top Scorer ha kane ka lympung la khur da u rangïalehkai jong ka Mooknor Thadmuthlong u Ïohi Dhar, uba la thep 8 kol, katba ka nam Best Goalkeeper ka leit sha u Lalmalsawma Tariang na ka Chutwakhu. Ïa ka khusnam Man of the Match la khur da u Trerigin Tariang na ka Chutwakhu bad Player of the Tournament la ïoh rah da u Gladio Susngi jong ka Chutwakhu.
Ka Chutwakhu kaba long ka lahduh ka la ïohpdiang ïa ka song pisa kaba T.50 hajar bad ka Mooknor ka la ïoh T.30 hajar. Ïa kine ki khusnam la sam da u kongsan Bah Finely Pariat uba long ruh u General Secretary ka MSOA bad u khun jong u (L) Chatister Kharkongor ha kaba la don lang ki bahaïing bahasem ryngkat ki dkhot bad nongïalam ka WJDSA.
