Mexico, Naiwieng:
Ki pulit ka New Mexico ki lap ia ki 20 tylli shynrong khlieh briew na kawei ka iing kaba la ingkhong ha kawei na ki shnong jong katei ka nongbah. Ia kane la lap hadien ba ki la buddien ia uwei u briew uba sah hangtei, uba kawang shyieng napoh ka kali jong u.
La ong ba dei ha ki khyndiat sngi ba la leit jong une bnai ba ki pulit ki la lap ia kane ka jingjia ha ka shnong Jal kaba don jingiadei bad kitei ki shynrong khlieh briew. Kumta ki bor pynïaid ka Mexico ki la rah noh ia baroh kitei shynrong khlieh ban ioh peit bniah lada dang lah ban pynithuh ia kitei kiba shah pyniap baroh bad ban wad ruh la ka jingiap jong ki ka don jing-iadei ne em bad ki jingjia shah pyniap ha ki por ba la leit.
Pynban na ka liang ka kynhun wad bniah ka dang wad bniah bha ruh ba ioh lehse katto-katne napdeng kitei shynrong khlieh ki dei kiba la shu thied ‘online’.
Ia kane la shem hadien ba uwei u briew u la phla ha ki pulit ba katba u dang kit sngewbha ia uwei u briew ha ka 5 tarik u Naiwieng, uta u briew ba kiew ha ka kali jong u, u la kawang ia ki jaboh na ka pla ba u rah ha kaba u la suba ba katto-katne ki dei ki shynrong khlieh briew.
Kumta ki pulit ki la leit wad ia kitei ki shynrong khlieh bad ki la ioh ban phah peit bniah ha ki nongpeit bad la shem shisha ba ki dei shynrong khlieh briew.
