Shillong, Naiweing:
Ka Deloitte India ka la pyllait paidbah ha ka sien ba nyngkong ïa ka Enterprise Growth Awards 2024 (EGA 2024), kaba long ka sienjam treikam ban ïathuh ïa ka jingnoh synñiang ba shi katdei jong ki longïing kiba don ïa ka kam khaïi-pateng, ki Unicorns bad Soonicorns ha ka thaiñ Shatei, Shathie, Mihngi bad Sepngi ka India.
Kane ka jingai khusnam na ka bynta kine ki thaiñ, ha kaba ïa mynta la shah ban ïashim bynta, kan dei ka jingrakhe ïa ki kompani kiba la pyni shisha ïa ka jingtrei bha kum ki nongïalam kiba hakhmat, kiba don ka thong bad kiba kiew shaphrang bad wanrah ïa ka jingnoh synñiang sha ka roi ka par jong ka imlang sahlang baroh kawei.
Na ka bynta kane ka jingai khusnam kan don ka jingjied kaba janai ïa ki kompani katkum ki kyndon kiba kynthup ïa ka rukom treikam ha ka liang ka pisa tyngka, ka jingdon ïa ki buit stad treikam thymmai bad ka jingtrei kaba wanrah jingkylla ha ka imlang-sahlang. Kawei na ki kyndon ban jied ïa ki kompani ba pynïaid da ka ïing ka sem ban ïoh ban ïashim bynta ka long ba kadei ban dei ka kompani kaba ka jingïoh nongjong ka ka long INR 1,000 klur bad INR 5,000 klur, bad ka jingdon ïa ka bhah kaba long haduh (palat 26 na ka shispah).
Ki kam kiba dang shu seng ne ki Start-ups kiba don ïa ka dor hapdeng US$500 million bad US$1 billion ki lah ban ‘apply’. Na ka bynta kane ka jingai khusnam yn khmih bniah ruh ïa ki rukom buh ïa ki jingthoh ha kaba ïadei bad ka pisa tyngka naduh lai snem mynshwa khnang ban tip ïa ka jingkiew jong ka kompani ha ka jingkiew jong ka kam bad ka jingnoh synñiang sha ka imlang-sahlang. “Ngi ai mynsiem ïa baroh ki kompani kiba don ïa ka jinglah ban ïashim bynta khnang ban pynlong ïa kane ka sienjam kaba jop,” ong U K. R. Sekar, Partner and Leader – Deloitte Private, Deloitte India.
