Nongpoh, Naiwieng 17
Ka Dorbar Raid Marngar ha ryngkat bad ka shlem treikam jong u Syiem ka Raid Marngar ha ka 17 tarik u bnai Naiwieng, 2024 ki la lah ban pyndep ïa ka jingkñia jingkhriam, ka lehniam lehrukom ïa ka ‘Lei Lukhmi’, ka Blei jong u Kba u Khaw kumba la ïalam da ki mynbarim naduh kulong-kumah.
Ïa kane ka lehniam lehrukom la sdang nyngkong shwa na ïingsad pynbud sa ka jingïaid paidbah sha ka madan lehniam hakhmat ka skul Sankardev Secondary School bad hadien ka jinglehniam lehrukom ha kane ka madan ryngkat ka shad ka tem bad ka put tynrai, pynbud sa ka jingïaid lynti ban lehniam biang ha khyrdop shwa ban poi sha ka ïing sad jong ka Syiem Marngar.
Haba la poi ha khyrdop, ka don pat ka jinglehniam, ka kñia ka khriam bad ka jingpynïap ïa ka Blang lieh bad uwei u Syiar lieh hakhmat ka khyrdop, pynbud biang sa ka lehniam lehrukom bad ka jingpynïap biang ïa u Syiar lieh bad bad ka Blang lieh hakhmat ka ïing Sad hashwa ba u Syiem un rung shapoh.
Haba kren sha ki lad pathai khubor, u Syiem ka Hima Mylliem, u Pa’iem Ainam Manik Manik Syiem u la ai khublei ïa ka Raid Marngar bad ki khun ki hajar kiba la pynneh pynsah ïa ka riti ka dustur ba la buh naduh u mynbarim bad kane ka pynpaw pyrthei ïa ka jingriewspah ka kolshor tynrai jong ka Raid Marngar ba la buh naduh u longshuwa-manshuwa.
U la ong ruh ba kane ka jinglehniam jong ka Raid Marngar ka long kaba kham pher na kiwei ki Raid hapoh ka Hima Mylliem namar ka Raid Marngar ka dei kaba dang bat ïa ka riti ka dustur, ka kolshor tynrai ban pynneh pynsah ïa ka jinglehniam bala buh naduh u mynbarim.
U Pa’iem Ainam u la ai kitbok-kitrwiang ba ki khun ki hajar hapoh ka Raid Marngar ba kin dang im pahuh pahai ryngkat ka koit ka khiah ba U Blei nongbuh nongthaw un dang kyrkhu kyrdoh ïa ki.
U Pa’iem Richard Syiem haba kren ha katei ka sngi u la ong ba kane ka jinglehniam ka dei kaba kham kyrpang namar ka dei kaba la leh shisien ha ka 5 snem ha kaba ki 14 kur kiba don ka sad ka sunon, kiba don ki mawshyieng bad ki kpep shyieng ki shim bynta ha katei ka jinglehniam ban ainguh aidem ïa u Blei nongbuh nongthaw ba u Blei un ai ïa u kba u khaw ba pahuh pahai ban bit ban biang ka khaïi ka pateng bad ban ïada na ka jinglyngshop bad kum ka Raid Marngar haduh mynta kim shah ïa ki paidbah ne ha ki iew ki hat ban rah ïa u kwai im bad u Sohphlang katba ym pat dep ka jingot kba.
U la ai ruh ka jingkitbok ïa ki khun ki hajar jong ka raid ba kin dang im pahuh pahai ban pyndep ïa ka aiom ot ba u Blei nongbuh nongthaw un dang kyrkhu kyrdoh, ka koit ka khiah ryngkat ka khaïi ka pateng kaba biang.
