Khliehriat, Naiwieng 17
Ka Diengshynrum SC bad ka Shilliang Umshnong ki la lah ban pynthikna ban jam sha ka final ha ka 1st Division Football Tournament ba pynïaid da ka East Jaiñtia Hills District Football Association (EJHDFA).
Ha ka jingïakhun semi final kaba la long ha madan artificial turf kaba ha Khliehriat, ka Diengshynrum ka la pynliem noh ïa ka Wahïajer Narpuh YSSC lyngba ka tie-breaker da 3-1 kol.
Hapdeng kane ka jingïakhun kine ki kynhun ki la ïakhaid mar 1-1 kol. Ka Diengshynrum ka la pynkhih jar nyngkong lyngba u Fadical Pohshna ha ka minit kaba 60, hynrei tang hadien 9 minit u Denzil Mukhim (69) u la lah ban pynïakhaid na ka bynta ka Wahïajer.
Ha kawei pat ka jingïakhun semi final kaba ar, ka Shilliang Umshong ka la jop da 6-1 kol ïa ka Ïatyllilang Hingaria. U Henjoymang Khongsai (38, 53 & 64) u la khur ïa ka hat-trick, katba ïa kiwei pat la thep da u Lhunminthang Thauthang (43 & 70) bad u Besterly Ksih (58). Ïa ka shi kol n aka bynta ka Ïatyllilang Hingaria la thep da u Western Pohshna (56).
Da kine ki nam jop ka Diengshynrum SC bad ka Shilliang Umshong SC kin ïaknieh ïa ka nam lahduh ha kane ka lympung bad ruh kine ki kynhun ki la kiew kyrdan sha ka Super Division ha kaba kin ïoh ban shim bynta naduh ka aïom ka ban wan.
