Bio : Ka kyrteng jong nga ka dei I Aquiny BefairlyneT Mawthoh bad nga dang leh ïa ka PhD ka jong nga ha ka sobjek Entomology
Entomophagy kaba mut ba pyndonkam ïa ki khñiang ki puit kum ki jingbam. Kane ka ktien ‘Entomophagy’ ka wan na ka kyntien Greek, éntomos, kaba mut ‘khñiang’,” bad phagein, kaba mut ‘bam’. Ka jingbam ïa ki khñiang ka lah don naduh ki por ba mynshuwa ym tang ha ka ri jong-ngi hynrei sha kiwei ruh ki bynta jongka ri Asia, Africa bad Latin America. Kaba pyndonkam ïa ki khñiang kum ki jingbam ka ïarap ïa ngi ban lum ban lang ïa ki bam ki dih na ka bynta ka lawei (food security) namar ba ha kine ki khñiang ki don shibun ki nutrients kiba donkam na ka bynta ka met jong u briew kum ki protein, bitamins, carbohydrate, ki minerals bad kiwei kiwei de. Katkum ka jingwad bniah la lap ruh ba ki protein ki kham bun ha ki khñiang ban ha ki doh. Haba ïa junor ïa ka rukom ri ïa ki mrad bam doh kum ki masi, ki sniang bad ki syiar bad ka rukom ri ïa ki khñiang, ngi shem ba kaba ri ïa ki khñiang ka kham suk namar ki donkam tang khyndiat eh ki jingdonkam, kum ka um, ka bam, ka jaka bad ki pynmih ruh tang khyndiat eh ki gas kiba sniew( Greenhouse gases). Kine ki khñiang ki don ïa ka jingim kaba lyngkot (life cycle), ha kaba ngi lah ban ïoh ïa ki ha kano kano ka por ba duna bam duna dih. Da kaba ngi pyrshang ban bam ïa ki khñiang ngi lah ïakynduh ïa ka jingdonkam jongngi kaba man la ka sngi bad ruh khlem da pynthut ïa ka jingdonkam jong ki pateng. Ha ka jylla Meghalaya ka jong ngi ki don bun ki khñiang kiba ngi lah ban bam bad ngi lah ruh ban shem ruh ïa kiba die ha ki iew ki hat kiba kynthup kum u ‘ñiang ryndia, ‘ñiang phlang, ‘ñiang taser, bad kiwei de bad don ruh kiba die ïa ki khñiang ha ka dur u powder hadien ba lah dep tylliat. Ym baroh ki bam ïa u khñiang, don ki bym bam ïa u na ka daw ba ki sngewkynjing ïa u, hynrei lyngba ki jingdon jong ki teknology ba thymmai kum ka 3D printing machine ki lah ban khleh ïa u bad kiwei pat ki jingbam kum u corn flour, wheat flour bad kiwei kiwei de. Da Kaba khleh ïa u bad kine bad shon ïa ki ha ki dur kum u biscuit lane ha kano kano ka rukom pynwan dur ba ngi kwah ka lah ban khring ïa kiwei de kiba kynjing ban bam ïa ki. Ki don kiba buh jingkylli hato ym don jingma mo ban bam ïa kine ki khñiang? Katkum ka FA0 (Food and Agricultural Organization) jong ka United Nation, ka don don katto-katne ki kyndon lane ki aiñ haba ïadei bad kaba bam ïa ki khniang. Ki don ki briew kiba lah ïoh allergy haba bam ïa ki khamtam kito kiba ïoh allergy haba bam ïaki doh um(seafood), ki lah ban rah bun jait ki bacteria kiba sinew kum ki E. coli bad Campylobacter lane ki viruses, parasite lane ki fungi. Namar ïa ki khñiang ngi bam baroh shi met, don kiba don ïa ki dawai bih (chemicals) kum ki dawai khñiang, ki bih metals (Toxic metals) bad kiwei kiwei de ha ka met jong ki. Na kane ka daw, ka kham bha shibun eh ban bam ïa ki khñiang kiba ri hi ban ïa kiba shu lum ne tam sha lum sha wah. Kiba bun ki khun samla jong ka jylla jong ngi ki kyrduh kam kyduh jam, da kaba sdang ïa kane ka kam ri khñiang bam ka lah ban ïarap ïa ki bad ka lah ruh ban kyntiew ïaka ioh ka kot ka jylla ka jong ngi.
Silkworm larvae and pupae selling in Motphran, Iewduh
Picture credit : Aquiny
Location:Motphran, Iewduh Shillong, Meghalaya
