Shillong, Naiwieng 18
Kan long ka sien nyngkong eh ba ka Shooting Association of Meghalaya ha ryngkat ka jingïatreilang bad ka Laitkor Shooting Club na Airforce Station, Laitkor ban pynlong ïa ka 1st Inter-School Shooting Championship ha ka 16 bad 17 tarik mynta u bnai.
Ha kane ka lympung la wanrah lang ïa ki 20 ngut ki khynnah samla skul kiba don sap na hynriew tylli ki skul. Ki nongïashim bynta ki la ïakhun ha ka 10M Air Rifle bad 10M Air Pistol, bad pyni shibun ki sap kiba phylla lyngba ka jingtrei shitom, bad ka jingminot ha ka jingïalehkai.
Ha ka jingïalang pynkut, la ai burom ïa ki nongjop lyngba ka jingai khusnam ha ki bynta bapher bapher. Ki kongsan kiba kynthup ïa ki heh na ka Shooting Association of Meghalaya, ki nongmihkhmat na Laitkor Shooting Club, bad ki heh na NRAI ki la ïa don bynta ban burom ïa ki nongjop bad ai mynsiem ïa baroh ki nongïashim bynta.
Haba ai jingkren ha katei ka sngi, u Wing Commodore u la pdiang sngewbha ïa ki nongïalehkai, ki kmie ki kpa, bad ki nongïalam jong ka SAM, bad pynpaw ba ka Laitkor Shooting Club ka kloi ban ïatreilang bad SAM-NRAI ban pynlong ïa ki jingïalehkai kiba ai jingmyntoi ïa ki samla ka Jylla.
Na ka liang u President ka SAM bad uba long u Vice President ka National Rifle Association of India, u Bah John F. Kharshiing, u la ong, “Kane ka jingïalehkai kam dei tang ka jingïakop, hynrei ka jingrakhe ïa ka sap bad ka jingtrei shitom. Ka thong jong ngi ka long ban pynshlur bad thaw lad ïa ki nongïasiat suloi ban poi sha ki kyrdan ha ka National bad ha International.”
U Bah Kharshiing u la ai khublei kyrpang ruh ïa ki heh ka Air Force Station, Laitkor, halor ka jingïarap kaba khlaiñ bad ailad ba kane ka jingïakop kan long kaba jop, bad pynpaw ka jingkyrmen ba kane ka jingïatreilang kan nangkiew ban pynmih ïa ki nongïalehkai ba kynsai ka Jylla.
Ha ka jingïakop siat jong ka .177 Peep Sight Air Rifle NR ha ka liang ki Sub Youth Women, ka Kopal Dubey (APS School) ka la jop bad ïa ka takma rupa la khur da ka Surbhi Singh (APS School. Ïa ka takma ksiar ha ka Sub Youth Men la khur da u Abhimanyu (APS School), katba u H Susaanth Lal (APS School) bad u Dhanistha Thakuria (APS School) ki la khur ïa ka takma rupa bad rnong.
Ha ka Youth Women la rah da ka Syesha O Hek (APS School). Katba ha ka Youth Men la ïoh jingjop da u Mayank Vats (APS), ba-ar u Mannat Yadav bad balai u Ishaan Sharma. Ha ka .177 Air Pistol NR jong ka Sub Youth Women ka Lalgouhao Singson (Mizo High School) ka la khur ïa ka takma ksiar. Ha ka Youth Women la jop da ka Da-I- Labynta Ryntathiang kaba la khur ïa ka takma ksiar bad ha ka Youth Men la jop da u Lamphang M Allya (Government Boys HSS).
