Shillong, Naiwieng 18
Ka Malki SC ka la ïoh jingjop ha ka lympung ïalehkai 1st Division Football League 2024 ba la pynïaid da ka Shillong Sports Association, hadien ba ka la lah ban pynliem noh ïa ka Pohkseh SC da 2-1 kol ha ka Lah Sngi U Blei ha SSA Stadium, Polo.
Kane ka nam jop ka la wan urlong lyngba ki kol ba la thep da u Pynhun Nongshli bad u Elisha Ryntathiang na ka bynta ban pynlong ïa katei ka kynhun ban ïoh lai point.
Ha kane ka jingïakhun baroh ar tylli ki kynhun ki la pyrshang ban ïakhun tyngeh naduh kaba sdang hynrei kim shym la lah pat ban pynurlong haduh kaba kut jong ka kylla step. Dei ha ka kylla miet ba ka Malki ka la ïoh ban pynkhih jar nyngkong eh lyngba u Pynhun ha ka minit kaba 50. Hadien 12 minit kane ka kynhun ka la pynbud biang sa shi kol lyngba u Elisha na ka bynta ban tam da 2-0 kol.
Hadien katto-katne por ka Pohkseh ka la lah ban pynphai kylla shi kol lyngba u Stevenson Shadap ha ka minit kaba 72. Kumta haduh kaba kut jong ka jingïalehkai kane ka kynhun kam shym la lah shuh ban pynphai bad ka la mad ïa ka jingshah rem.
Ka jingïalehkai ha ka Sngi Ba-ar kan long hapdeng ka Mylliem SC pyrshah ïa ka Nongrah SC ha ka por 11:30 mynstep, katba ka Lawsohtun SC ïa ka Mawtawar SC ha ka por 2:30 janmiet.
