Shillong, Naiwieng 19
Ka kynhun ki ‘thei ïalehkai hockey ka ri India ka la lah ban pynthikna ban ïoh rung sha ka final jong ka lympung ïalehkai Asian Champions Trophy 2024, hadien ba ka la lah ban pynliem noh ïa ka Japan da 2-0 kol ha ka Sngi Ba-ar ha Rajgir Sports Complex kaba ha Bihar.
Kane ka nam jop ka la wan urlong lyngba ki kol ba la thep da ka Navneet Kaur ha ka minit kaba 48 bad ka Lalremsiami (56).
Da kane jingjop ka India kan pynkhreh ïa ka jingïakhun pyrshah ïa ka China ha ka phainal, katba ka Japan kan ïakhun pyrshah ïa ka Malaysia na ka bynta ban ïaknieh ïa ka kyrdan balai. Na ka liang u coach u Harendra Singh bad ka kynhun jong u kin hap ban wanrah ïa ka jingïalehkai kaba kham bha shibun hapoh 24 kynta lada ki kyrmen ban bat ïa ka nam lahduh.
Watla ki ‘thei ïalehkai ka Japan ki la pyrshang ban ïakhun tyngeh khamtam eh ka nongapkol ka Yu Kudo, hynrei kim shym la lah ban khanglad ïa ka jingtbit ki ‘thei ïalehkai ka India namar kane ka kynhun ka la ïoh ïa bun tylli ki kabu kiba biang kiba la wan lyngba ka penalty corner.
Haba phai sha kawei pat ka jingïakhun semi final, ka China ka la lah ban pynliem noh ïa ka Malaysia da 3-1 kol.
