Ka la long shisha ka khubor kaba sngew triem bad pynïeng shñiuh ban ïohsngew bad ïohi ba kawei ka kynthei ka la shah thang im ha la u jong u tnga kaba la jia ha ka shnong Niriang kaba hap hapoh ka Thadlaskeiñ Block ha West Jaiñtia Hills District, haduh ba ka la wanrah ïa ka jingbitar na ki ba bun ba lang kiba la dawa ruh ba dei ban pynshitom da kaba tyngeh. Ngim lah ban mutdur ba ha ka jaidbynriew Khasi-Jaiñtia ba utei u briew un leh haduh katto-katto ïa ka kynthei ha kane ka juk. Hooid kum ïa kine ki jingjia la ju sakhi sha kiwei pat ki jylla jong ka ri hynrei lah ban ong ba ka lah ban dei ka sien nyngkong hapoh Ri-Khasi Jaiñtia ruh kin don kum kine ki briew ki bym don shuh ïa ka jingïatip lem ne ka jingsngew para briew haduh ban shim syndon da kane ka lynti kaba shyrkhei haduh katta-katta.
Haba peit katno ka jingsngew pang met pang mynsiem, katno tam lei lei ïa kane ka kynthei kaba la ngat ha kane ka apot jong ka jingshah leh beiñ bad shah thombor. Ki kam shah thombor jong ki kynthei kam dei shuh kaba dang thymmai hynrei ka dei kaba la ju jia na ka por sha ka por bad wat hapdeng ka jingpynkhamti ïa ka kynthei da ki aiñ kiba tyngeh ban tehlakam ïa uno-uno u shynrang ban leh beiñ ne ban beiñ ïa ka hynrei kum kine ki jait kam pat ki dang ïai jia na ka por sha ka por. Pynban ka jingthombor kan long da kane ka rukom pat, ym sngewlah shuh ban sngewthuh ba haduh katno kata ka jingdom ne bitar ban hap ban shim da kane ka lynti. Shano shuh kata ka jingsngew para briew ne ka jingïatip lem? Kane ka jingleh ka pyni ba la dei ba la synshar da u dohnud ksuid.
Kaba kham sngew lyngngoh shuh shuh halor kane ka jingjia, ka long ba balei ka wan paw pyrthei hadien palat shi bnai bad kaba la wan paw ruh tang lyngba ki paralok jong kane ka kynthei kiba la leit ban wad ïa ka sha ïing hadien ka jingjah rngai bad ban lap pat ba ka la thiah pang. Kum kine ki jingjia pyrshah ïa ki kynthei ne kaba ngi ju tip ruh kum ki ‘domestic violence’, sexually abuse’ ki jia na ka por sha ka por hangne ha ri jong ngi bad ïa kiba ngim lah ban ïoh jingtip (unreported cases) khamtam sha ki thaiñ nongkyndong, namar ha kiba bun ki khep kum kine ki briew kiba ngat ha kine ki apot, kim nud satia ban mih shakhmat ban ujor namar ki don hapdeng ka jingtieng na ka jingshah byrngem byrsit, kumba la sakhi ha kane ka jingjia shah im jong katei ka kynthei kaba khlem nud ban ïathuh ïa kaei kaba la jia sha la ki bahaïing bad haba kylli ki doktor la ïathuh ba ka thang hi ïalade namar ka jingtieng jong ka ïa ki jingbyrngem jong u. Ngi donkam ban sngewthuh ba ka jingsngap jar haba don kum kine ki jingjia, ki kylla long pynban kum ki jingpynshlur ïa kito ki nongleh sniew ne thombor.
Katei ka jingjia ha ka shnong Niriang ka wanrah ruh ïa ka jingkylli ba shano ka jah kata ka jingtip briew? Ynnai pat ïakren ïa kata ka jingtip blei. Kiba dang tip briew kin ym shlan ban leh haduh katto-katto lane ban pyrshang shim syndon ïa ka jingim jong kiwei. Ha ka jingshisha haba don jingeh ne don ka jingbym ïasngewthuh jingmut hapdeng ki ar ngut, kaba donkam eh ka dei ban ïakren sngewthuh da kaba jai-jai ne ban sngap shiliang shiliang. Kumba ka long mynta ka kam thombor pyrshah ïa ki kynthei ka la nangkiew ha kine ki snem kiba la leit watla ym pat don jingkheiñ ba biang ne thikna haduh katno, hynrei katkum ka National Family Health Survey jong u snem 2019-2020, ka jingdon ki kam thombor ïa ki kynthei hapoh ka Ri ka long kumba 30 persen, kata ïa ki kynthei kiba hapdeng ka rta 15 haduh 49, kumba 24.5 persen pat ka jingshah thombor ki kynthei ha la u tnga bad kumta ter ter.
