Shillong, Naiwieng 19 (UNI)
Ka tnad Enforcement Directorate (ED) ka la pynlong ïa ki jingkhynra ha 22 tylli ki jaka pyrshah ïa u Santiago Martin, uba la tip ruh kum u ‘Lottery King’, bad kiba ïajan bad u bad kurup T.12.41 klur hapoh ki kyndon jong ka Prevention of Money Laundering Act (PMLA).
Ïa ki jingkhynra la pynlong ha Meghalaya, Tamil Nadu, West Bengal, Karnataka, Uttar Pradesh bad Punjab lyngba ka ejahar ba la ujor da ka tnad pulit ka Meghalaya halor ka jingujor da ka ophis Director, Meghalaya State Lottery bad ki ejahar jong ki pulit Kerala ba la shimti da ka CBI.
Ha kajuh ka por, la khynra ruh ïa 4 tylli ki Printing Press ha kaba la shon ïa ki tiket (Lottery).
“Ki jingkynnoh ba hakhmat eh pyrshah ïa ka kynhun ka long ba ki la bat be-aiñ ïa ka ïew ‘Lottery’ khlem da shah ïa kiwei pat ban treikam, die ïa ki tiket thok, tuklar ïa ki khusnam ba jop bad ka jingthied ïa ki tiket jop ba-heh dor pyrshah ïa ka jingsiew pisa ban pynkylla ïa ka pisa bym don jingkheiñ (black money) sha kaba don jingkheiñ, kaba ïalam pat sha ka jingduhnong kaba khraw ïa ka pla tyngka bad u paidbah babun balang,” ong ka ED ha ka kyrwoh ha ka Lah Sngi U Blei.
Ha ka jingtohkit jong ka, ka tnad ka la lap shuh ba palat 90% ki kam khaïi jong ka M/s Future Gaming and Hotel Services Private Limited ka don ha ki tiket ‘Lottery’ ha ryngkat ka dor (face value) T.6 pyrshah ha kaba bun na ki khusnam ki long hapoh T.10,000 ka bym donkam siew khajna.
“Ym don kaiphod ba biang ba la lum thup da ka kompeni haba ïadei bad ki nongjop khusnam, ki tiket kiba la die bad bym pat die. Ka kompeni ka pynwandur ïa ki skhim ‘Lottery’ ha kata ka rukom ha kaba ka jingmyntoi kaba khraw ka leit sha ka kompeni katba ka Jylla ba pynïaid ka ïoh ka bynta kaba rit eh jong ka khajna,” ong ka ED.
“Ka jingkhynra ka la ïalam sha ka jinglap bad jingkurup ïa ka pisa ka bym don jingkheiñ kaba kot sha ka T.12.41 klur, ki tiar bapher-bapher ka juk mynta lem bad ki kot ki sla. Ha kajuh ka por, la pynïap noh ïa ka jingtreikam ka Bank FDR kaba T.6.42 klur ha kane ka jingkhynra,” ka la ong da kaba bynrap ba la lap ruh ïa ka jingpynlut ba-heh ha ki jingdon-jingem ki bym lah pynkhih ha Coimbatore, Chennai, Mumbai, Dubai bad London, nalor ki jingpynlut ba jur ha ki ‘Share Market’.
Ha ka jingtohkit ba ha shuwa halor katei ka kam ha ED, Kochi, la lap ba u Martin Santiago bad ka kompeni jong u ka la ïoh lum be-aiñ T.920 klur lyngba ka kam ‘Lottery’, ha kaba la pyndait lang ïa ki jingdon-jingem ba kot T.622 klur bad la ujor ejahar, ka jingbishar kaba dang ïaid.
Shuh shuh ka jingtohkit ka dang ïaid shakhmat, ong ka kyrwoh.
