Shillong, Naiwieng 19
U Myntri ka Sorkar Jylla, Bah Paul Lyngdoh ha ka Sngi Ba-ar u la pyntikna ba un sa shimkhia halor ka kaiphod ka ban sa aiti da ki samla pule ka North Eastern Hill University (NEHU) bad ban pynsngew sha ka tnad pule-puthi ka Sorkar Pdeng lyngba u Myntri Rangbah ka Jylla, u Conrad K. Sangma.
“Nga kwah ban pyntikna ba kine ki jingsngewkhia kin ym sahkut tang ha phyllaw jong ka skulbah ne ba ka jingïakhih shah thngan ki samla pule kan long kaba sep ei,” ong u Bah Lyngdoh hadien ka jingïakynduh bad ki samla pule kiba dang pynlong ïa ka jingïakhih shah thngan ha NEHU.
U la ong ruh, “Nga kwah ban pyntikna ba kane ka ‘Internal Report’ kaba ki samla ki la sdang ban lum ban lang, ki la pyntikna ba kin sa ai kopi sha nga mar sien dep bad hadien kata, ngan sa rah ïa kane sha u Myntri Rangbah ka Jylla bad lyngba jong u sha ka tnad pule-puthi ka Sorkar Pdeng,” u la ong.
Halor ka komiti tohkit kaba la thung da ka tnad pule-puthi ka Sorkar Pdeng, u Myntri u la ban jur ba la kumno-kumno ki dkhot jong ka komiti ki dei ban wan jngoh bad ban lap ïa ki jingshisha da lade. Haba kdew ba ka jingwan jong u kam dei tang kum u Myntri Sorkar uba sngewkhia ïa ka pule-puthi hynrei khamtam kum u samla uba la pule teng ha ka skulbah, u la ong ba ka long shisha kaei-kaei ka bym itynnad ban ïohi ïa ka jinghiar arsut jong ka NEHU.
“Hashuwa, ka NEHU ka long kawei na ki 50 tylli ki skulbah ba hakhmat eh ka ri, hynrei mynta ka la poi sha ka kyrdan ba 128 kaba pyni ba ka don ka nia, ka nongrim ha ka jingïakhih jong ki samla pule bad ka jingsynshar bad jingleh dorbor jong une u VC uba mynta u don hapdeng ka jingleit shuti,” u la ong da kaba bynrap ba ka pyni shai ruh ïa ki dak ki shin ba ka don ka jingduna ha kiba bun ki liang la ka long ha ka jingduna ki nongtrei, ka jingthung ïa ki briew ki bym long kiba tbit bad kumta ter-ter.
Haba kylli, u la ong ba kane ka dei ka skulbah ka Sorkar Pdeng bad kumta la khmih lynti ba katkum ka bor ba la pynkhamti ha ka skulbah da ka aiñ ka Parliament, dei ban lah ha ka ban pynbeit ïa kine ki kynrum-kynram. “Ha ka jingshisha, kane kam dei ka kam jong ka Sorkar Jylla, hynrei haba don u VC ba pura, kata ka hap hapoh ka bor jong u bad ka jingbthah jong u ban pynbeit ïa kino-kino ki kynrum-kynram,” ong u Bah Lyngdoh.
Ha kawei ka liang, u la ong ba ka Sorkar ka lah ban tuklar tang hadien ba lehse ka don ka jingbym shong suk shong saiñ. Halor ka jingkyrpad ban weng noh ïa ka jingïakhih, u la ong ba katkum ka jingpynsngew ki samla pule, kane ka dei ka kam kaba kin hap rah shuwa sha ka General Council.
“Nga sngewkhia ruh ym tang ïa ka koit ka khiah ki samla pule hynrei ka koit ka khiah jong ka NEHU…namar kane ka skulbah kaba la sei shibun ki khlur ha ka imlang-sahlang jong ngi. Ka ‘Department of English’ ha ka por ba pule ma ngi ka don ha ka kyrdan ‘Top-10’ ha ka ri, hynrei mynta ka la poi shano…te phi la sngewthuh – ka la hiar palat ïa ka 100, kata ka dei ka jinghiar arsut ka NEHU,” u la ong.
Shuh shuh halor ka jingleit shuti jong u Vice-Chancellor, Prof. Prabha Shankar Shukla wat hapdeng ka kynrum-kynram, u Myntri u la bynrap, “Ka dei ka jingbym kitkhlieh jong u, ka jingbym larkam jong u bad ka dei ruh ka jingbym lah jong u ban pynshisha ïalade kum u nongïalam.”
Ha kane ka sngi, u Chief Secretary ka Jylla, Bah D.P. Wahlang, DGP, Kong Idashisha Nongrang bad Deputy Commissioner ka East Khasi Hills, Kong R.M. Kurbah ki la wan mih sha katei ka jaka kaba ka NEHUSU bad KSU-NEHU Unit ki dang pynlong ka jingïakhih shah thngan mynta la 15 sngi.
