New Delhi, Naiwieng:
Ha ka por ba jur biang ki kam thombor ha Manipur, ka seng Congress ha ka Lah Sngi U Blei, ka la kyrpad ïa u Myntri Rangbahduh u Narendra Modi ba un leit jngoh ïa katei ka jylla kaba ïakynduh jingeh ha shwa ka dorbar ha Parliament ka ban long ha une u bnai bad ka la dawa ïa u Myntri ka tnat ki kam pohïing u Amit Shah ba un hiar shuki noh namar ka “jingbymlah ban pyntreikam pura” ha kane ka jylla.
U General Secretary jong ka seng Congress uba dei khmih ïa ka tnad Communication u Jairam Ramesh u la ong ba u Modi u dei ban ïakynduh shwa ïa ka kynhun jong baroh ki seng na Manipur bad nangta un khot ruh ïa ka jingïalang jong baroh ki seng ha ka ri ha shwa ka dorbar jong ka Parliament ka ban sdang ha ka 25 tarik, Nailar.
Haba kren ha ka jingïalang bad ki nongthoh khubor ha ka ophis treikam jong ka AICC hangne ha ryngkat u K Meghachandra Singh u heh ka Manipur Congress bad u In-charge jong ka AICC jong ka jylla u Girish Chodankar, u Ramesh u la dawa ba u Shah bad u Myntri Rangbah ka jylla u N Biren Singh ki dei ban hiar shuki noh.
“Naduh ka 3 tarik, Jymmang, 2023, ka Manipur ka la ngat ha ka jingshah ktah na ka jingjur jong ki jingïakynad bad u Myntri Rangbahduh u Modi u leit jngoh ïa ki ri bapher bapher jong ka pyrthei, u ai jinkren, hynrei um shym la don por ban leit jngoh ïa ka Manipur. Kumta, ka jingdawa ba nyngkong jong ngi ka long ba u Myntri Rangbahduh u la dei ban pyllait por shwa ka dorbar jong ka Parliament ban leit sha Manipur bad ïakynduh ïa ki seng saiñ pyrthei, ki riew saiñ pyrthei, ki seng bhalang, bad ki briew kiba don ha ki jaka sah ba shipor ha ka jylla,” la ong u Ramesh.
U heh nongïalam jong ka seng Congress u Jairam Ramesh bad u President ka seng Congress ha Manipur u K. Meghachandra u la kren ha ka jingïalang bad ki nongthoh khubor, ha New Delhi, ha ka lah sngi U Blei.
U la ong ba ka seng Congress ka la dawa ruh ba u Myntri Rangbahduh u la dei ban ïakynduh ïa ka kynhun nongmihkhmat jong baroh ki seng na Manipur bad hadien kane un sa khot na ka bynta ka jingïalang jong baroh ki seng saiñ pyrthei ha ka ri.
“Naduh ka 31 tarik, Naitung, 2024, ym don Lat ba pura. Shwa kata kawei ka briew na ka kynhun ST ka la long Lat hynrei la weng noh ïa ka hapoh 18 bnai. Ngi dawa ba dei ban thung mardor ïa u Lat ba pura,” la ong u Ramesh.
