Seoul, Naiwieng:
U nongialam ka North Korea, u Kim Jong Un ha ka Sngi Nyngkong u la ioh ban iakynduh markhmat bad u Myntri ka tnat ‘Natural Resources’ jong ka Russia hapoh ka nongbah Pyongyang jong ka North Korea hi, ha kaba kitei ar ngut ki nong-ialam ki la ioh ban iakren ia ki mat ba kongsan ban pynkhlaiñ shuh shuh ia ka jingiadei bad ka jingiatrei lang hapdeng ka North Korea bad ka Russia, wat hapdeng ka jingiakhun thma jong ka Russia pyrshah ia ka Ukraine.
U Kim u la ioh ban iakren bad utei u Myntri ka tnat ‘Natural Resources & Ecology’, u Alexander Kozlov, uba long u nonglam khmat jong ka kynhun Myntri na Russia kaba dei khmih ia ka khaii- pateng, ka ioh- ka kot bad kumjuh ruh ia ki laiñ ‘technology’ jong katei ka ri.
Ha kajuh ka por, la ong ba ka kynhun Myntri ba kyrpang na ka tnat ïada jong ka Russia ruh ka la leit poi sha North Korea hynrei ym shym la pynbna eiei halor ka jingthmu na kane ka jingleit kitei ki heh sha North Korea ha kane ka sien.
Namar la iohi ruh naduh kine ki khyndiat bnai ba la leit, ka United States bad ka South Korea ki la pynpaw pyrthei bad pynrem jur ruh ia ka North Korea halor ka jingphah jong ka ia 10,000 ngut ki shipai sha ka Russia, khnang ba ka Russia kan ioh ban pyndonkam ia ki hapdeng ka jingleit hiar thma sha Ukraine.
