Mawkyrwat, Naiwieng 19
Ka kynhun ïalehkai jong ka Pynoh Riwar FC ka la rung sha ka semi final ha ka lympung Golden Jubi-lee Celebration Football Tournament ba la pynïaid da ka Nonglang SC hadien ba ka la lah ban pynliem noh ïa ka Rangja-dong SC da 3-0 kol ha ka jingïalehkai kaba la long ha ka Lah Sngi U Blei ha madan Pynden Ïew Lyngdoh, Nonglang South West Khasi Hills District.
Haba phai sha katei ka jingïalehkai ha ka kylla step, mar sien sdang ka jingïalehkai ka Pynoh Riwar da ka jinglah ban ïalehkai bha ha ka minit kaba 11 ka la ïoh ban pynkhih nyngkong ïa ka jar lyngba u Manbha Iawphniaw uba phong ïa ka jersey number 3.
Haba bteng ïa ka jinglehkai ka Rangjadong ka la ïa khun tyngeh bad ïoh ruh shibun ki kabu hynrei da ka jinglah ban kyrda u rangap kol ka Pynnnoh Riwar kam shym la lah ban pynurlong haduh ban da kut ka por jong ka kylla step.
Haba wan sha ka kylla miet ka Pynnoh Riwar lyngba ka jingtbit ki rangïalehkai ka la nioñ tyngeh ïa ka liang pyrshah bad dei ha ka minit ba 56 ba u Manbhalang Iaw-phniaw u la ïoh biang ban thep ïa ka kol ba ar lyngba ka penalty hadien ba u rangïalehkai shadien ka Rangjadong u la pynur ïa u rangïalehkai ka PNR bad bud sa ka kol na u Chesterpaul Lyngdoh ha ka minit ba 82.
Ïa ka nam Man of the Match ha katei ka jingïalehkai la ïoh da u Manbhalang Iawphniaw bad ïa ka khusnam la ïoh ban sam da u Bah Shiningstar Wanniang.
Na ka liang ka Nonglang SC lyngba u Bah Kordorlyne Khar-lyngdoh, Secretary u la pyntip ruh ba ka jinglehkai kaba bud kaba dei ka jinglehkai Quarter final kaba ar, kata ha ka 20 tarik u Naiwieng 2024 kan long hapdeng ka Ïawpaw FC pyrshah ïa ka PNR Jr FC ha ka por 2:00 noh phai sngi.
