Imphal, Naiwieng:
U MLA jong ka seng JD(U) ha Manipur, u Abdul Nasir, u la thoh sha u Myntri Rangbahduh ka ri, u Narendra Modi, ha kaba u la kyntu ïa ka sorkar pdeng ba kan pynbna ïa kito kiba donkti ha kaba pynïap ïa ki kynthei bad ki khynnah ha Jiribam distrik, kum ki “lehnoh”.
U Nasir, uba dei u MLA jong ka Lilong konstitwensi ha ka thaiñ Thoubal, u la ñiew ïa kitei ki jingpynïap briew kum ka kam khawpud bad ka kam thombor kaba shyrkhei kaba la palat liam halor ki bynta baroh.
“Kane ka kam shyrkhei ka la long shaba palat bad ka la poi haduh u pud jong ki kam khaweit. Kito kiba donkti ha ki kam pynïap briew ki dei ban shah pynbna kum ki lehnoh da ka sorkar India”, la ong u Nasir.
Da kaba khot ban kem mardor ïa kiba donkti ha ki jingpynïap briew, u la kyntu ïa ka Parliament ban mynjur ïa ka rai ha ka dorbar ban wan, da kaba pynrem jur halor ka jingjia.
Wat lada la don ki jingkyrpad na ki shnong kiba don ha ki kyndong kynshrot bapher bapher, ka jingshah pynshitom beiñ jong ki longkmie bad ki khynnah ha ka rukom kaba ishyrkhei bad ka bym don jingkheiñ briew shuh ka la nang bteng.
Ki metïap jong ki Meitei kiba la jah rngai na Jiribam hadien ka jingïasiat hapdeng ki bor pahara bad ki lehnoh Kuki-Zo kaba la pynlong ïa ka jingïap jong ki 10 ngut ki lehnoh ha ka 11 tarik Naiwieng, la lap ha ka wah Jiri ha Jiribam bad ha ka wah Barak ha Cachar jong ka Assam.
Kitei ki 6 ngut, kiba kynthup ïa lai ngut ki kynthei bad ki khynnah, uwei pa uwei na ka jaidbynriew Meitei, ki la jah rngai na kawei ka jaka sha ba shipor ha ka thaiï Borobekra jong ka Jiribam bad la kynnoh ba ki la shah rahbor ha ki lehnoh Kuki-Zo.
Kane ka jingjia ka la pynmih ïa ki jingïakhih kiba jur bha ha ka jaka them jong ka Imphal, ha kaba ki nongïakhih ki la rung sha ki ïing jong palat shispah ngut ki MLA, kynthup ki Myntri, bad ki la thang ïa ki katto katne tylli ki jaka kiba dei jong ki MLA.
Hapdeng kane ka por ba jur ki kynrum- kynram, ka seng National People’s Party (NPP) kaba don 60 ngut ki MLA ha Manipur Assembly, ka la weng noh ïa ka jingkyrshan na ka sorkar ba la ïalam da ka seng BJP, da kaba kynnoh ba ka jingsynshar jong u N Biren Singh ka la lah ban pynbeit ïa ka jingeh bad ban pynphai biang ïa ka jingsuk ha ka jylla. Ka jingweng noh ïa ka jingkyrshan kaba la long ha ka sngi U Blei, la kumno kumno kan ym buh jingeh ne ktah ei ei ïa ka sorkar BJP, naba ka seng BJP ka dang don ha ka jingbun paid ryngkat bad ki 32 ngut ki MLA jong ka.
Ka seng BJP ka ïoh jingkyrshan ruh na ki san ngut ki MLA jong ka Naga People’s Front (NPF) bad hynriew ngut ki MLA ka jong ka sewng JD(U).
Ki la don palat 220 ngut ki briew kiba la shah pynïap bad da ki hajar ngut ki la duh jaka shong jaka sah na ka jingkhie ka jingïakynad kaba jur hapdeng ki Meitei kiba shong ha ka them Manipur bad ki jaka ba marjan ba shong shnong da ki kynhun Kuki-Zo naduh u bnai Jymmang jong u snem ba la lah.
Ka Jiribam kaba don ki jaitbynriew bapher bapher, ka bym ju kham shah ktah ha ki jingïakynad ha ka them Imphal bad ki lum ba marjan, ka la sakhi ïa ka jingïakynad hadien ba la lap ïa ka met jong uwei u nongrep ba la shah ot lyngkhot na kawei ka lyngkha ha u bnai Jylliew jong une u snem.
