Nongstoiñ, Naiwieng 19
Ha ka 19 tarik u bnai Naiwieng 2024 da ki spah ngut ki paidbah nongshong shnong jong 6 tylli ki shnong ka thaiñ Wahlyngdoh ha West Khasi Hills kynthup ïa ki khynnah skul, ki dkhot na ki kynhun seng ka thaiñ Maweit ki la ïashim bynta ha ka jingïaid paidbah kaba jai jai lane ka ‘peace rally’ ban pynpaw ïa ka jingpynrem ïa ka jingshah pynïap u nonghikai ka Presbyterian LP School Rimynniar bad ka jingpyrshah kaba jur ïa ka jingjyllei jong ki nongdie kyiad hapoh ka shnong Rimynniar, West Khasi Hills.
Ïa katei ka rally la pynlong da ka Synjuk ki Nongsynshar Shnong Hynriew Shnong Central Wahlyngdoh, ïa kaba la sdang ruh na ka shnong Rimynniar najan jong ka skul da ka jingpynlong ïa ka jingsngap jar kaba shi minit bad pynkut ïa ka rally ha shnong Wahlyngdoh da ka jingïalang.
Ka sur kaba la sawa kaba la mih na ki paidbah na kane ka rally ka long ba dei ban set shi jingim ha patok ïa u nongpynïap briew, u bym don shuh ïa ka jingïatip lem para briew.
U Secretary ka Synjuk u samla Shemphang Tyrsa u la ong ba ka jingthmu jong kane ka rally ka long kum ka dak ka jingpynrem ïa ka jingpynïap bad ka jingpyrshah ïa ka jingjyllei jong ki nongdie kyiad beaiñ hapoh ka shnong Rimynniar.
Lah ban kdew hangne ba ha ka shiteng synñia jong ka 12 tarik u Naiwieng, 2024 ha ka por kumba 1 baje eiei uwei u nonghikai jong ka skul Rimynniar u Babu Bokstar Sohlang, 50 snem ka rta na ka shnong Mawkhlam-Nongpyndeng ha West Khasi Hills u la shah pynïap dusmon da kaba shah ot na u pdot, kaba la jia ha kawei na ki jaka hapoh ka shnong Rimynniar ha uwei u briew ïa uba la tip kyrteng u Piswel Langrin, uba la shah kem noh ha ki pulit.
Ka Kong Mislinda Ryntong, kawei na ki longkmie kaba hap hapoh katei ka Synjuk bad ka Kong Saraphina Ryntong kawei na ki nonghikai kaba don hapoh ka Synjuk ki la pynpaw ïa ka jingsngewkhia kaba jur ha kaba ïadei bad ka jingmih jong ka jingjia ïa pynïap hapoh ka shnong Rimynniar.
Haba pynpaw ïa ka jingpynrem ïa u nongpynïap briew bad pyrshah ïa ka jingjyllei jong ki nongdie kyiad beaiñ, ka Kong Mislinda ka la dawa na ki bor jong ka aiñ ba kin pynshitom katkum ka aiñ ïa u nongpynïap briew bad ka la ong ruh ba ka daw jong ka jingwan jong ka jingïapynïap briew ka dei na ka kyiad.
Ka Kong Saraphina ka la ong ba ka long kaei kaei ka ban ym lah ban pyrkhat ba kat ïa ka jingim un shim tang ha ka jingbakla ha ka ktien ka thylliej lehse. “Kum ka longkmie nga kwah ban ong ba ngi kwah ïa jingsuk ka jingsaiñ, ïa ka jingbha ka jingmait,” ong ka Kong Saraphina.
U President ka KSU Nongtraw Unit u samla Ebrius Ryntong u la ong, hato ka kam pynïap briew ka dei ka tamasa? Hato lada ki bor jong ka aiñ ki ai jem ïa kito kiba pynkheiñ ïa ka aiñ, hato ka imlang ka sahlang ka don jingshngaiñ? Bad hato kane ka rally kan shu dei tang kaba shu ïaleh thamula?
U Bah Endrius Ryntong, General Secretary ka FKJGP Maweit Circle u la ong ba ka seng ka pynrem jur ïa ka jingleh riewkhlaw jong u Piswel Langrin uba la shim syndon ïa ka jingim jong u Babu Bokstar, namar kata ka seng ka phah ïa ka kyrwoh sha ki bor jong ka aiñ ba dei ban pynsaja ïa u katkum ba shong ka aiñ.
U samla Jerimaiia Dkhar, President ka HYC Maweit Circle u la ong ba ka seng ka phah ka khubor sngewlem sha ki bahaïing bahasem jong u Babu Bokstar. “Kane ka jingleh ka dei ka jingleh jong ki riew khlaw, ka mynsiem kaba phong da ka mynsiem jong ki mrad kaba ngim don shuh ka jingïatip lem ka jingïaieit para briew bad ym don shuh ka jingsngewlem kaba ngi don hapoh ka mynsiem,” u la ong.
Katba na ka liang ki pulit ka thanat Nongstoiñ pat haba ai jingkren ki la phah ïa ka jingsngewlem sha ki bahaïing bahasem kiba ïakynduh ïa katei ka jingjia, da kaba ki la pynpaw ruh da kaba ong, “Hooid ka long kaei kaei kaba sngew shyrkhei kaba sngew triem haba ki ïohi ïa kum kine ki jingjia”.
Shuh shuh ki la pynpaw ruh ba kaei kaba u nongleh kam sniew u dei ban ïoh ïa jingpynsaja lane ka jingpynshitom un ïoh katkum ka aiñ kaba don hapoh ka Ri.
